Saturday, October 18, 2008

آسف على الإزعاج

المرض النفسي يعتبر أرض خصبة لخيال كٌتّاب السيناريو .. لأن الانسان بطبعه عنده فضول يعرف المريض النفسي بيعيش ازاي .. وهل بيبقى مستوعب انه مريض ولا شايف الحياه بيس يا مان
وفي بعض الاحيان .. بنكون احنا نفسنا مرضى نفسيين .. لكن من جوانا بنكابر ونقول لأ
!!! أنا مش قُصير أوزعه .. انا طويل واهبل
----

لما فكرت اشوف فيلم آسف على الازعاج .. سألت واحد صاحبي شافه .. قاللي لو انت رايح الفيلم عشان تضحك .. مش هتضحك كتير .. لكن لو رايح عشان تستمتع بفيلم وتمثيل وكده .. يبقى روح وانت متطمن
واستطرد صديقي قائلا .. يا راجل ده انا عيني دمّعت في الفيلم
!!!!!!
وانا واقف مستني ادخل السينما .. لقيت الفيلم نازل باتنين أفيش .. أول افيش .. أفيش نجم .. واللي هو تحت الكلام ده على طول .. واللي فيه احمد حلمي خايف من خياله .. والبوستر ده لخّص حاجه مهمة جدا .. واللي هي ان مريض الفصام بيبقى عنده احساس انه مضطهد .. ومن كل الناس حتى من خياله
تاني أفيش للفيلم .. فيه مجموعة صور للمثلين الأساسين في الفيلم .. ولما دققت في الصور بتاعتهم .. لقيت حاجه في الاول ماكنتش فاهمها .. لكن لما اتفرجت عالفيلم وبصيت عالافيش وانا خارج .. ابتسمت كده وافتكرت لقطات في الفيلم وربطتها بالرمزيه بتاعة وضع الصور عالبوستر .. والتأثيرات المعموله على وشوش الممثلين .. ولقيتني فهمت بس ايه المغزى من شوية حاجات .. زي تنية الصورة اللي عامله الخط اللي فاصل وش احمد حلمي لنصين .. والخط اللي على رقبة محمود حميده ومنة شلبي .. والنغبشه اللي على وش دلال عبد العزيز مع وجود خط على خفيف قوي في النص .. واللي بيقول ان الام برضه عايشه في صراع من حزنها على تعب ابنها
!!! ولقيتني بقول بعدها .. يا ولاد الايه
القصة والسيناريو والحوار .. لـ أيمن بهجت قمر .. ومش هتكلم عنه كمؤلف أغاني معروف بكلماته اللي بتبقى سهله على الودن .. والملحن بيقدر يعمل منها نغمة حلوه .. وبالتالي الناس ترددها وبكده الاغنيه تتعرف .. زي اغنية شيرين في الفيلم واللي الكل حفظها وحبها قوي
لأ .. انا هتكلم عن أيمن بهجت قمر .. كمؤلف وسيناريست
ايمن رصيده في السينما فيلمين قبل الفيلم ده .. هم فيلم بحبك وانا كمان وفيلم عندليب الدقي .. وزي ماهو باين كده .. كان بيختار الافلام تكون بتتكلم عن كواليس عالم الغناء - باعتبار انه واحد من أفضل الشعراء الغنائيين في الفتره دي - لكنه كان من خلال الفيلمين دول .. بيستعد لفيلم آسف على الإزعاج .. والحقيقه هو استعد كويس جدا وعمل حاجه فعلا كويسه .. وبجد بجد .. شكله هيبقى افضل سيناريست زي ماهو أفضل شاعر غنائي

اول ما الفيلم نزل .. بعض الناس قالو ان الفيلم مسروق من فيلم بيوتيفل مايند .. والحقيقه انا مش عارف هم ربطو بين القصتين ازاي .. يعني دي قصه وليها دراما .. ودي قصه وليها دراما .. ولو اللي قالو كده ربطو بين الفيلمين بناءا على مشهد المستشفى لما بيقعد حلمي جنب محمود حميده على الدكه في الجنينه اللي برا المستشفى .. والمشهد اللي بيسأل حلمي فيه الجرسون بتاع الكافيه اذا كان فعلا في حد بيشاورلو ولا هو بيتخيل .. يبقى ربط خاطئ جدا
لأن المرجع الاساسي لأي سيناريست لما يتكلم عن مريض نفسي .. هو اللي بيشوفه وبيقراه وبيعرفه عن تصرفات المرضى النفسيين .. و المشهدين دول تحديدا .. هم اكتر حاجه متوارده في آخر تحليلات الطب النفسي عن مريض الفصام .. لأن مريض الفصام بيفضل لغاية آخر لحظه قبل العلاج شايف اللي هو بيتخيل وجوده في الحياه .. وبيفضل في حالة حوار وصراع مابين هل هو حقيقه ولا خيال .. وبعد مابيتعالج المريض بيفضل شاكك في بعض الاحداث اللي بتحصل حواليه .. وده هو نفس اساس المشهدين دول
اكبر عيب في الفيلم .. نهايته .. المبرر اللي بناءا عليه بتتكلم منه شلبي مع حلمي في آخر الفيلم مش حلو خالص .. وكان ممكن يتم تبرير تصرفها ورغبتها في التعرف عليه .. بإنها مثلا مثلا .. شافت الصورة اللي رسمهالها حلمي أول مره شافها .. وحبت تشكره على انه رسمها .. ودي كانت هتبقى أوقع دراميا في الحدوته
القصة والسيناريو والحوار .. تسعه ونص من عشره

التمثيل .. الفيلم ده كان فيه اتجاه التمثيل السهل الممتنع .. يعني التمثيل البسيط جدا .. والصعب جدا جدا .. لأن المحرك الاساسي للشخصيات .. هي دراما وقصة الفيلم نفسها .. ولازم كل واحد من اللي مثلّو في الفيلم ياخد حقه تالت ومتلت
محمود حميده .. العملاق .. واللي لما شفت صورته عالبوستر قلت لألألألأ .. الفيلم شكله حلو بجد .. لأن محمود حميده تاريخ .. وصعب انه يرمي تاريخه في عمل مش قد كده .. ولما شفت الفيلم وركزت في دوره .. لقيت انه زي مايكون مكتوب ليه فعلا .. ده مش مكتوب ليه وبس .. لأ .. ده هو فعلا الشخصيه اللي في الفيلم بكل أبعادها .. بخفة دمها باسلوبها بهدوئها بعصبيتها .. بكل تفاصيل الشخصيه .. وده معناه انه تقمّص الشخصيه وبقى هو وهي حاجه واحده .. وده أصعب حاجه في التمثيل .. ولو انها مش جديده عليه
عشره من عشره يا استاذ محمود حميده
أحمد حلمي .. لما صاحبي قاللي انه ماضحكش قوي في الفيلم .. استغربت جدا .. مش استغراب فيه تقليل من احمد حلمي كممثل تراجيدي .. لأني عارف انه ممثل كويس جدا .. ومش من فيلم كده رضا ولا فيلم آسف على الازعاج – لأني كنت لسه ماشفتوش – بس عارف انه ممثل كويس جدا من دوره في فيلم عمر ألفين واللي شايف انه دور عمره .. كمان ماينفعش انسى فيلم سهر الليالي .. لما قال لمش فاكر مين من الممثلين في الفيلم .. انا مش وسخ .. الجمله طالعه من حد درس الشخصيه اللي بيمثلها بأبعادها الدراميه والنفسيه وكل تفصيله فيها
كمان بيبقى صعب على الكوميديان انه يعمل عمل فني غير كوميدي بالدرجة الأولى .. وبيكسّل ويقول انا بتاع ضحك .. يبقى اخليني في الضحك .. لكن لأن حلمي ممثل ذكي جدا .. شاف ان الجمهور مستعد يتقبله بالدور ده .. ده مش يتقبله وبس .. ده يبصم بالعشره انه ممثل فعلا .. كفاية الماستر سين بتاع الفيلم واللي من أول ما ابتديت اتفرج عالفيلم وانا عايز اشوف هيعمله ازاي .. وفعلا لما جه وهو بيتفرج عالصور وبيسأل والدته
مافيش حد في الصور ؟؟؟ مافيش حد في الصور ؟؟؟
عشره من عشره يا وودي آلان السينما المصريه .. على رأي تامر حبيب السيناريست
منه شلبي .. دايما الممثلات الفيديت او الجميلات .. بتبقى في أي فيلم بتعمله حاطه لنفسها استايل معين .. استايل لبس وكلام يمشي مع آداء الشخصيه .. ولغاية تلت الفيلم ماكنتش عارف ايه الاستايل بتاعها او ما كانش باين قوي .. لكن لما ابتدت الحدوته تبان .. فهمت ايه السبب في ده .. وده معناه انها سابت نفسها للمخرج هو اللي يتحكم فيها وفي آداؤها التمثيلي .. وطلعت في الآخر .. ولا أروع من كده
عشره من عشره يا منه
دلال عبد العزيز .. بجد بجد بجد .. حسيتها أمي .. نفس حنية الام على ابنها وخوفها وحرصها عليه وعلى مستقبله .. أم بجد
وآخر شوت في الفيلم كان لازم يقفل عليكي .. وكانت قفله صايعه قوي وعجبتني قوي قوي قوي
عشره من عشره يا ماما دلال عبد العزيز
محمد شرف .. كارثة الفيلم .. ولو أطول اديه جايزة خاصه هعملها
عملت كل حاجه بمعنى كل حاجه .. كوميديا فارس او كوميديا صارخه .. كوميديا لايت .. كوميديا سوداء .. وختمتها بتراجيديا بسيطه .. وكل ده .. في مشهدين بس
عشرين الف من عشره .. وربنا يشفيك ياعبقري

الموسيقا التصويريه .. عمرو اسماعيل .. باعشق الموسيقا المصريه اللي بيعملها .. لكن مش عارف ليه هو لجأ للأغاني الاجنبيه وحطها ساوند تراك في مشاهد كتير من الفيلم .. زي مشهد الموتوسيكل لما حلمي بيسافر هو ومنه شلبي
أي نعم مبرَر ان حلمي يسمع اغاني اجنبي باعتباره مهندس طيران .. وباعتباره حد ابن ناس هاي وأبوه طيار .. لكن هي دي منطقتك بقى يا عمرو .. انك تمزج بين الموسيقا الشرقيه بتاعتنا - واللي انت استاذ فيها - بايقاع غربي يمشي مع الدراما ومع الشخصيه
وكان نفسي انك تكون ملحن اغنية المرايا اللي غنتها شيرين في الفيلم .. اللي لحنها الملحن محمد يحي .. أي نعم انا عارف ان التلحين غير وضع الموسيقا التصويريه .. بس انا كنت منتظر منك شغل اكتر من كده
الموسيقا التصويريه .. تمانيه من عشره

التصوير .. أحمد يوسف .. واعتقد ان الفيلم ده أول فيلم يبقى هو مدير التصوير بتاعه .. وكان واضح جدا تأثره بمدير التصوير الامريكاني اللي اشتغل معاه في مسلسل لحظات حرجه .. خصوصا ان المسلسل في حد ذاته كان فكره امريكاني وتم تناولها باسلوب جديد
اتفنن احمد يوسف في انه يعمل لقطات جديده على السينما المصريه .. زي المشهد بتاع الموتوسيكل لما حلمي سافر هو ومنه شلبي .. وبرضه اللقطه اللي بيكون فيها احمد حلمي في البانيو .. وبالرغم من اني ضد الأمركة شكلا وموضوعا وتكنيكا .. لكن لو دي بداية فكر جديد .. تبقى بداية كويسه ومبشره
بس المهم .. انه يبقى في بعد كده تجديد وتطوير للي يعبر عننا كمصريين
التصوير .. عشره من عشره

الديكور .. محمد أمين .. دايما لما باشوف اسمه على أي افيش .. بابقى عارف اني هشوف شغل ديكور حلو.. خصوصا وان أول مره اهتميت فيها بكلمة مهندس ديكور في السينما .. كانت في فيلم أفريكانو ..واللي كان محمد امين هو مهندس الديكور بتاعه
في فيلم اسف على الازعاج كان جو اللوكيشنز كلها محصور بين بيت احمد حلمي .. والكافيه اللي بيقعد فيه .. والمطار اللي هو بيشتغل فيه .. والمستشفى
وبالرغم من اني باحب الجو الشعبي في شغل محمد امين .. وباحسه فعلا بيستمتع وهو بيعملو اكتر من أي جو تاني .. لكن في الفيلم ده استمتعت قوي .. ووصلت لقمة استمتاعي بجد .. في المشهد اللي بيدخل فيه أحمد حلمي مكتب ابوه .. بعد مابيخرج من المستشفى .. يالهوي على رقعة الشطرنج ورمزيتها
الديكور .. عشره من عشره

المونتاج .. الحقيقة ماخدتش بالي مين المونتير في تتر الفيلم .. لكن اعتقد انه هو نفسه المخرج خالد مرعي .. خصوصا وانه اصلا مونتير وعمل مجموعة أعمال كتير جدا .. أفضلهم من وجهة نظري .. فيلم جنة الشياطين وفيلم عمارة يعقوبيان .. لأن مونتاج الفيلمين دول بالذات عايز حالة خاصه .. لازم تكون ناعمه وهاديه في وقت .. وفي وقت تاني لازم يبقى الايقاع سريع لدرجة انك ماتقدرش تبربش بعينيك
في فيلم آسف على الازعاج .. المونتاج كان ماشي ناعم وكويس في الجزء الأولاني .. وبعدين ابتدى يتسارع قوي قوي لغاية مشهد حلمي وهو بيكتشف الحقيقه .. وهنا بقى كان التمكن بجد .. لأنه في المشهد ده تحديدا .. وبالرغم من طول حوار الام نسبيا .. لكن الايقاع كان حلو قوي .. خصوصا انه قفل المشهد قفله ناعمه
ورجع لعب بينا وبمشاعرنا تاني مع اللقطات المختلفه .. في اغنية المرايا اللي غنتها شيرين
المونتاج .. عشره من عشره

الاخراج .. خالد مرعي .. ودي تاني تجربه ليه كمخرج بعد فيلم تيمور وشفيقه .. بعيدا عن المونتاج .. ومن اشهر المونتيرات اللي تحولو للاخراج .. المخرج والفنان الراحل شادي عبد السلام .. والفرق بين المونتاج والاخراج بيكون في توجية الممثل للعمل ككل .. وده حصل هنا في الفيلم كويس قوي .. كفاية وجود ممثل بتقل محمود حميده في دور الاب .. بينما كان ممكن المخرج يستسهل ويجيب حسن حسني او عزت ابو عوف .. لكن لأنه مخرج واعي .. عرف يعمل ده
كمان في حاجه تتحسب للمخرج خالد مرعي في الفيلم .. واللي هي قدرته على السيطره على احمد حلمي كممثل كوميدي .. وعدم انسياق حلمي للكوميديا اكتر من الحد المطلوب .. وكمان السيطره دي حصلت برضه مع المجاميع والكومبارسات وتوجيهاته ليهم ولنظراتهم في الفيلم .. خصوصا في اللقطات اللي بتجمع حلمي بمنه شلبي
وهو ده الاخراج من وجهة نظري .. السيطره على العمل ككل
الاخراج .. عشرين من عشره

آخر حاجه بعد الدش الكتير ده كللو .. اسم الفيلم فيه رمزيات كتير
.. زي ان صناع الفيلم بيقولو اسف على الازعاج .. لكل نجوم الكوميديا
لأنهم عملو فيلم بجد .. مش شوية افيهات على رقصه وغنوة أي كلام وخلاص
.. وزي ان صناع الفيلم .. عايزين يخلو المشاهد يقول .. اسف على الازعاج .. للحكومة
!!!! اللي ممكن تكون مجرد خيال جوانا .. ووهم بنعيشه .. واحنا مش عارفين
سوووو

59 comments:

ojg said...

أول تعليق
:P
اقرا وأجي

Miss. Sosa said...

انا قريت خبر المدونة الجديدة قولت اجي ابارك هنا الاول وبعدين ارجع


بجد الف الف مبروك علي المدونة ونقدك وتحليلك رائع جدا للفيلم ويشجع اننا نتابع السينما المصرية

انا كالمعتاد مااتفرجتش علي الفيلم لاني مش متابعه جيدة لا لتلفزيون ولا لسينما الصراحة ههههههه

بس شكلي هغير رأي بعد قراية تحليلاتك السينمائية ان شاء الله

وربنا يوفقك يارب

Z_Diva said...

hamout washouf elfilm da bgad, shaklo wahmy, we kmn b3d eltfsesa de, b2et 3yza ashofo aktar

b2olk eh, ana asln b7b elaflam tet7r2ly, whna felimrat elfilm da hynzel saif 2222 3la ala2al, fa mtsharfnsa felmdowana -hya ah mahgora 7alyan, bas ana bashan2ar 3liha kl yom 3shan ahweha walam3ha-, we ed5ol 3alcomments fe a5er post, we e7kily elfilm beltfseel allah ykrk wenaby ya5oya, estf2ana ?

فاروق عادل said...

تحليل جامد جدا انا دخلت الفيلم وعجبنى كتيييييييير

Z_Diva said...

ah sa7 we 7ga kman, plz plz plz, fe naf zat saf7t elcomments, eb2 oly ezay a3mel reader 3shan a3rf awel ma ay 7ad fiko yktb 7ga gdeed badal elka3b eldayer elly b3mlo kol yom da ya 5oya, wefl2a5er mal2esg post, we nzam fot 3lina bokra b2a wenta 3ref elnzam :S

ojg said...

شوف
أولا التحليل متمعن جدااااا
بحسك مش بتتفرج على الفيلم زينا
بتتفرج بأبعاد تانيه
برؤية تانية
دا العلام حلو يا جدعان
:)

ثانيا
الفيلم بجد بجد أحلى فيلم شفته لحلمي
ومن غير تريقة أنا دخلته 3 مرات
وفعلا استمتعت في كل مرة

ثالثا
عجبني بجد انك برضو ماحرقتش الفيلم
رغم انك فصفصته فصفصة مش ممكن
بس برضو ماقولتش مين راح فين
:))

رابعا
تسلم إيديك
بس هو الفيلم الجاي امتى وإيه؟
:)

مهندس مصري بيحب مصر said...

ياه دا انت جبار يا سوو
يعني هو الفيلم عن عقدة الإضهاد
انا مشفتوش لسه
ثم ده الفيلم كده جايب فوق الـ 100% و حيخش طب
ايدك كانت فرطة في الدرجات و لا الفيلم اللي ممتاز
اظن الفيلم ممتاز حقيقي لإن محدش قال عنه غير كده
بداية قوية للمدونة دي
ربنا يكرمك يا باشا

nona said...

هو تحليلك ممتاز للفيلم
و الفيلم اساسا جميل و ممتعة مع انى لما شوفتة حسيت انى تهت شوية لكن بعد كدة عرفت الحدوتة و هو جميل جدا
بس برضة الواحد ضحك فية ماكنش نكد يعنى
و الف مبروك على المدونة الجديدة

aya said...

الله عليك لما تركز وتحلل وتقييم

شوف انا دخلت الفيلم 3 مرات

واول مرة اخد بالى من موضوع الافيش ده

والموسيقى
مش قادرة افتكر تحديدا كانت نوعها ايه

لكن الاغنية كانت معدية
واحمد حلمى بعد ما كان بيبكينا من الضحك
قدر يبكينا من الاسى عليه

بص انا يمكن معرفش احلل زيك كده

بس انا فعلا شايفة انه احمد حلمى افلامه بقت مركة مسجلة للفكر الجديد والاداء الراقى

انا كواحدة من الشعب بحكم على الفيلم من خلال حاجتين
انه لو كوميدى يبقى اموت من الضحك
ولو فيه قصة ودراما يبقى هاعيط هاعيط

تانى حاجة
انه لو دخلته مع اصحابى عادى
مع اخويا عادى
مع عيلتى كلها عادى

وديه المعادلة اللى متهيالى صعبة تتوجد فى اى فيلم
انه يكون فيلم محترم للعائلة بكل افرادها

تسلم دماغك يا احمد على التحليل القوى ده

ومنتظرة الفيلم الجديد

ربنا يكرمك ويسعدك ويباركلك

بنت مصريه said...

تحليلك فوق الراااائع يا سوووو
بجد
انا كنت داخله الفيلم ومعرفش قصته
واتفاجئت لما ف الجزء التانى ابتديت افهم حاجات مكنتش فاهماها ف الجزء الاول
انا بحييى جدا كاست الفيلم كلهلانى استشاريه نفسيه وعارفه يعنى ايه فصام وهلاوس

كل واحد فيهم عمل دوره ببراعه
بحيث يخرج احمد حلمى بموهبته الرائعه دى
كشخص مصاب بالفصام


اه الكلمه اللى قالها احمد حلمى ف فيلم سهر الليالى
هىقالها لخالد ابو النجا

لما قاله
انا مش وسخ يا على
هههههههههههههههه
عشان تعرف بس ان مش انت لوحدك اللى بتشوف افلام هههههههههههههههه
احييك عالبوست الرائع
والتحليل المفصل

Ahmed Al-Sabbagh said...

تانى مرة : فرحتى بالمدونة دى تفوق فرحتى بأى مدونة جديدة تانية
وكنت بتمناها من زمان
وانت عارف رأيى في رؤيتك السينيمائية

Ahmed Al-Sabbagh said...

انا سمعت دش كتير عن الفيلم ده وكل واحد قال كلام تانى خالص عن التانى

بصراحة كلامك من الاااااخر

Soooo said...

ojg

والله باتفرج عالفيلم عادي خالص
وبشوف الفيلم مره واحده بس
ولما اقعد مع نفسي اشوف في ايه حلو وازاي وليه وكده
وفي ايه وحش ويتعمل كويس ازاي وليه
الموضوع زي ماتشوفي فستان في محل وتقولي لو كتافه مش عارفه معموله ازاي ووسطه يتعمل ازاي وبتاع
يعني احساس اكتر مما هو علم

واعتقد اني لو حرقت احداث الفيلم .. ابقى مش باتكلم عن الفيلم ككل وهابقى باتكلم عن قصة الفيلم بس .. وده مش صح .. والله اعلم يعني

وياستي لسه مش عارف هتكلم عن ايه المره الجايه
بس هحاول انوع شويه
ايه رأيك .. اتكلم عن تجربة دخولي لمعهد السينما .. ولا عن سينما حرفوش ببنها؟؟؟؟

ملحوظه
والله العظيم مابيفرق معايا تعليق اول من اخير
كفايه انك تعبتي نفسك وشرفتيني بتعليقك





سلاموووووووووووز

Soooo said...

Miss. Sosa

اهلا اهلا بست الداكتوره اللي بتختفي وتيجي وترجع تختفي تاني

بصي بقى .. حكاية انك مش متابعه للتفلزيون انا برضه معاكي في ده
لأن الاعلام اللي بيجيلنا حتى لو من قنوات خاصه فضائيه .. بيبقى اعلام موجه توجيه خاطئ

والسينما فيها وفيها .. يعني في مجموعة افلام نزلت في العيد .. ماتفهميش مين السفيه اللي ممكن يدخلها
وفي نفس الوقت في افلام بتقدم حالة حلوه وجميله المشاهد بيستمتع بيها

واللي هحاول اعمله هنا اني اتكلم عن الافلام الكويسه من وجهة نظري عشان اللي عايز يشوف حاجه يبقى فاهم ايه الجو العام

وربنا يكرمك ياستي ويارب اللي بقوله يعجبك ويعجب كل الناس
ووماتختفيش كده مره واحده





سلاموووووووووز

Soooo said...

Z_Diva

يا قهلا بام زعبولا القله

بصي ياستي .. لو انتي محموقه قوي على انك تشوفي الفيلم .. في سايتات عالنت رافعه الفيلم متصور من سينما .. بس نصيحه من اخوكي .. بلاش تنزليه منها لان الصورة وحشه والصوت اوحش
ولو انتي عايزه تستمتعي بالفيلم قوي يعني .. وصعب انه يتعرض في السينما عندكم .. هو كده كده قدامه شهر وينزل سي ديهات
اعتقد انه هيبقى سهل انك تشتريه من عندكم .. ولو مافيش توزيع قولي لأي حد في مصر يجيبه ويبعتلك السي دي .. او هتلاقيه اترفع عالنت وتقدي تنزليه بصورة كويسه وكواليتي انضف بكتير من الهبل اللي موجود عالنت اليومين دول

وبخصوص الريدر .. انا هاشوفلك موضوع كان في حد عامله عن الريدر واديكي لينك بتاعته وتمشي الخطوات خطوه خطوه
وهتلاقي انه اسهل من شكة الدبوس




سلاموووووووووووز

Soooo said...

طالب ثانوى

ربنا يكرمك ياروقا ويارب باقي المواضيع اللي هكتبها هنا تعجبك وتعجب كل الناس

ماتقوم تزاكر شويه





سلامووووووووز

Soooo said...

مهندس مصري

ههههههههههههههههههه
بقى الفيلم جايب فوق الميه في الميه وهيخش طب
ماااااشي ياهندزا

بس بجد الفيلم حلو حقيقه .. وعمل معادلتين صعبين قوي .. اللي هم شباك التذاكر .. والنقاد
يعني على مستوى شباك التذاكر عمل ايراد هايل جدا ومشجع للمنتجين انهم يتجرأو ويعملو افلام اجتماعيه جديده بدل ماهم كانو منساقين ورا الكوميديا والاسفاف وبس
وعلى مستوى النقاد .. ابتدو النقاد يدركو ان الممثلين والمخرجين الشباب عايزين يعملو حاجه بجد .. مش مجرد فلوس وخلاص

وربنا يسهل وباقي المواضيع تعجبك وتعجب كل الناس ان شاء الله




سلاموووووووووووز

Soooo said...

nona

ماهو هنا بقى الحبكه السينمائيه .. انك تحسي في حلقه مفقوده من الفيلم .. ومره واحده تبدأ الحاجات تتكشف للناس
وهو فيلم يعتبر اجتماعي اكتر منه كوميدي .. وده لازم على فكره
لأنه لو كان اتكلم في الموضوع من غير ما يحط حتة تخفيف للموضوع كان هيبقى صعب على الناس
واحمد حلمي لأن دمه خفيف بلافطره عمل ده بسهوله وعرف يوصل بالمشاهد انه يتعاطف مع الشخصيه ويحبها

والله يبارك فيكي ياستي .. ويارب باقي المواضيع اللي هتكلم عنها ان شاء الله يعجبك ويعجب كل الناس




سلاموووووووووووز

Soooo said...

aya

الله يكرمك ياستي على كلامك الحلو ده

وفعلا انا زيك برضه باقيس الفيلم بحاجه مهمة قوي
واللي هي رد فعل الاهالي لو شافو الفيلم ده مع ولادهم
والفيلم بجد يعتبر نضيف وراقي وبيقدم حاله حلوه اضافة على انه بيقول بين السطور حاجه مهمة وليها عمق سياسي

واعتقد ان حلمي بياخد خط جديد في الافلام اللي بيعملها دلوقتي .. وهي التعبير عن الشباب بمختلف فئاته وبمخختلف مشاكله .. سواءا كانت مشاكل ماديه او اجتماعيه او حتى نفسيه
وبكده هو ممثل فعلا مش مجرد واحد بيعمل حركات تضحك الناس عليه اكتر ماتضحكهم ليه

ومره تانيه باشكرك على كلامك الجميل ده ويارب اقدر اقول هنا اللي يعجبك ويعجب كل الناس






سلاموووووووووووز

Soooo said...

بنت مصريه

الله ينور عليكي
انا مش وسخ ياعلي

ده انتي طلعتي سينمائيه اكتر مني اهو

----
وعلى فكره .. المخرج خالد مرعي مخرج الفيلم هو وايمن بهجت قمر .. جابو مجموعة دكاتره واخصائيين نفسيين وعرضو عليهم فكرة الفيلم واستشاروهم في حاجات كتير
وهي دي المصداقيه .. اني لما اتكلم عن حاجه انا مش ملم بيها بدرجة كافيه .. اخد رأي الخبير فيها
وعشان كده طلع الفيلم حلو في معظم نواحيه من تأليف لتمثيل لإخراج

والف شكر ياستي ويارب اللي اكتبه هنا يعجبك ويعجب كل الناس






سلامووووووووووز

Soooo said...

Ahmed Al-Sabbagh

صبابيغو ابن منتقتي

عارف يا صباغ انك كنت بتشجعني اعمل الخطوه دي من زمان
بس كل وقت وليه ادان

وياسيدي ربنا يكرمك على مشاعرك ناحيتي وناحية المدونه
وربنا يقدرني واكتب اللي يعجبك ويعجب الناس يارب





سلامووووووووووووووز

Anonymous said...

أخيرااااا

بص يا سيدي
كل اللي إنت قلته حلو جدا
أنا نفسي دمعت على حلمي في مشهده مع دلال عبدالعزيز وهو بيقولها مفيش حد في الصور

فعلا حلمي تفوق على نفسه
لكن الفيلم يا سوووو
كان ممل جدا بتطويله

بمعنى..طولوا قوي قوي في سرد الجكاية
وماركزش كتير على المرض والعلاج وكده

كنت حاسة إن مش فيه توازن
يعني بعد الاستراحة

الاحداث جت متلاحقة جدا

بس بجد فيلم منتاااز منتااااز

يسلمواااااااااا

Z_Diva said...

ah inta ht2oly 3la elnos5a el3azima elly mawogouda online, nzltha we awl mft7tha omt 3amla delete, ana wa7da sa7bt mazag matfrgsh 3la 7gat t3asbny kda :D

we mashy ya sedy, hnstana ama ngyb el cd, mesh moshkila :D

ama fema y5os ellink, walahy yb2a gzak allah kol 5er ya soooo ya 5oya :D

fottak be3fya ana b2a :D

ابن حـجـر الـعـسـقـلانـى said...

المفروض الناس بتوج جوجل و بتوع بلوجر يعملوا حاجة تخلى الناس اللى بيعلقوا يتمكنوا من "التصفيق" فى التعليقات

أصل أنا عايز أصفق بس مش عارف

بص يا سوووو .. أنا واحد مش بيفهم قوى فى التفاصيل الفنية للعمل السنمائى .. يعنى باخد الفيلم كله على بعضه كدة و احكم عليه كواحد عادى عجبه القصة و الإضاءة مثلا .. أو مافيش افتعال فى المواقف .. أو أحس بحبكة الأحداث ... يعنى الحاجات اللى بتبقى فى ظاهر العمل السينمائى

لكن لما حد بيقعد يحلل العمل السينمائى مش بيقدر يلفت انتباهى

لكن و الله يا سوووو أنا استمتعت جدا بكلامك عن الفيلم .. مافيهوش كلاكيع و لا تعقيدات

بصراحة يا سوووو ... انت خليتنى أعرف أشوف الأفلام إزاى بعد كدة .. عارف لما تسمع مقطوعة موسيقية و تقعد تفصص فى آلاتها الموسيقية و تشوف الآلة دى عملت إيه .. و دى عزفت إزاى .. حاجة زى كدة

بجد مستنى المزيد .. و الله ينور عليك

Sha2loob said...

طبعاً يعد الكلام الحلو اللي الناس قالته ده أنا مقدرش أضيف جديد
انت شخصياً فناااااااااااااااان
وأنا لسه مستني أكتر من سوووو

mahmoud abuzaid said...
This comment has been removed by the author.
mahmoud abuzaid said...

انا مسحت الكووومينت الاولاني طبعا يا سووووووووو


وجاي المره دي عشان اكتب التعليق اللي انا فعلا كنت عايز اكتبووووووو


انت فعلا كنت اكثر من رائع في تحليلك للفيلم وانت لما اديت للاخراج عشرين من عشره عندك حق ميه في الميه

لان الفيلم فعلا ممتاز وتحليلك للفيلك كمان كان في محله

Alkomi said...

انا لغاية دلوقتي عايز اعرف نعيم ده حقيقي ولا من دماغ المريض برضه

عشان اللي بيقول حقيقي ليه اسبابه و اللي بيقول وهمي ليه برضه اسبابه افتنا يا سووووووووووووووووووو

Anonymous said...

ألف مبروك يا نجم على المدونة الجديدة واللى بجد أنا كنت مستنيها من زمان جدا

انت من أكتر الناس اللى بستمتع جدا وانا باسمعهم بيتكلمو عن السينما اللى هي أكتر حاجة بحبها في حياتى

مش بس عشان انت حد فاهم يعني ايه سينما لكن عشان انت حد فاهم ايه علاقة السينما بالدنيا اللى احنا عايشينها واللى بيحصل فينا

بالنسبة للفيلم العبقري اللى انت بتتكلم عنه انا من وجهة نظري اللى مش عارف ليها قيمة ولا لا ... ان الفيلم ده لازم يصنف من أحسن أفلام السينما المصرية ... أول من الأفلام اللى ليها بصمة في السينما المصرية

الفيلم ده ممكن يكون تحول في اتجاه السينما ككل لو صناع السينما عارفو يستغلوها

الفيلم ده ليه أبعاد كتير ممكن تأثر في أى بني آدم يشوفه ... ويوصلك انك تفكر في حاجات كتير في حياتك .. مش معنى كده انك مريض نفسي ... بس كل حد فينا بيعيش بشخصيتين .. الشخصية اللى الناس كلها بتشوفها والشخصية اللى بينه وبين نفسه

أنا من كتير أوي كان نفسي اتفرج على فيلم فيه ناس بتمثل بجد .. بتمثل لدرجة تقنعك انها لا يمكن تكون مش حقيقية

مش هاينفع أتكلم على واحد واسيب التانى لأن كل اللى عملو الفيلم ده يستاهل موضوع كامل لوحدة

أنا آسف على الازعاج وانى طولت عليك .. بس الفيلم ده لو قعدت اتكلم عليه للسنة الجاية مش هاسكت

وألف مبروك مرة تانية على المدونة

أخوك الصغير
محمد زهير

Soooo said...

Bannoura

بصي يابنت عمي
انا مش معاكي في انهم طولو في الحكايه والسرد والحاله اللي هو كان فيها
لسببين .. اول سبب انه كان لازم يخلي المشاهد يتعايش مع الحدوته ويندمج معاها وبيشجعها كمان وعايزها تنتهي على خير .. وبالتالي لما يحصل الكشف للحاله وللحدوته الاساسيه بتاعة الفيلم .. يبدأ انه يربط الموضوع ويعيش في نفس الحاله اللي عاشها البطل من حزن وحسره وصراع
تاني سبب .. ان احمد حلمي كان بيعمل حالة بهجه وكوميديا في الجزئية دي من خلال حواراته في الاختراع ومشهد زيارته للرئيس ومشاهده مع ابوه .. وده كان بيخلي اللي بيتفرج يندمج في كزا محور وكزا سكه مش مجرد سكه واحده واللي هي قصة الحب اللي بين حلمي ومنه شلبي

وبعدين اه فعلا الفيلم ما قدمش العلاج والكلام ده .. لأنه مش مفروض انه يقدمه قد ماهو المفروض يقفل الدراما اللي فتحها
يعني مش شرط انه يبقى فيلم بيتكلم عن شرح العلاج في المرض النفسي .. هو يادوبك سلط الضوء على شخص من النوعية دي .. وجاب الصراع اللي هو كان فيه قبل الموضوع
يعني ده كفايه يطرح في فيلم سينمائي

وانتي ازيك
يارب تكوني بخير





سلامووووووووووووز

Soooo said...

Z_Diva

اهو انا زيك كده يا ام زعبولا ياختي
يعني في افلام بتنزل بره وبابقى نفسي اشوفها .. والاقي عيال صحابي منزلينها متصورة من السينما .. وبتبقى انضف من تصوير السينما بتاعة هنا بمرااحل
لكن انا لأ .. ان ماشفتش الفيلم سينما او على الاقل دي في دي .. يبقى ما اشوفش الفيلم احسن

وبخصوص اللينك .. انا قلبت الدنيا عليه عشان اجيبهولك لكن تقريبا اللي كان عامل الموضوع بتاع الريدر اختفى او قفل المدونه .. مش عارف راح فين بجد

بس هحاول اشوفلك لينكايه تانيه وربنا يسهل





سلامووووووووووووز

Soooo said...

ابن حـجـر الـعـسـقـلانـى

مش للدرجة دي يابو العساعيس
الحوار ابسط من التعقيدات والكلاكيع اللي بنقراها في الجرايد والمواقع المختلفه اللي عالنت

السينما حاله .. لو حسيت بالحاله دي هتقدر تتكلم عنها

والف شكر يا ابو العساعيس على تشجيعك الدائم لشخصي المتواضع ولمدونتي البسيطه
وربنا يكرمك دنيا وآخره يارب





سلامووووووووووووز

Soooo said...

Sha2loob

الله يكرمك ياحسن يارب
وياسيدي ولا فنان ولا بتاع
الحوار اني باقول اللي حسيته بس مش اكتر

وربنا يسعدك ويكرمك يا شقلوب ياخويا





سلاموووووووووووز

Soooo said...

mahmoud abuzaid

الحمدلله انك حذفت التعليق القديم .. بس المهم انك تشغل دماغك وتفكر كويس قبل ما تعمل اي حاجه في حياتك

وياسيدي الف شكر على كلامك الجميل ده
وفعلا الفيلم حاله حلوة ولازم ادي الاخراج الدرجة دي
مش الاخراج وبس .. كل عناصر العمل السينمائي كانت حلوة الحقيقه

ملحوظه
باتمنى ان اللي اتفقنا عليه يكون اتعمل




سلاموووووووووووز

Soooo said...

محمد الكومي

بص يا كومي
نعيم حقيقه ولا خيال .. مش دي القضيه
المهم ان الشخصيه قالت كلام كتير في الجون
وده هو المهم
الكلام مش نمطية الشخصيه

يعني مثلا ممكن لو كنت اتفرجت على فيلم اسباني اسمه وقود الثورة .. طول الفيلم بيتكلم عن الثورة الفرنسيه
طول الفيلم
وفي الاخر .. تكتشف ان الحدوته كلها بتدور في خيال بنت صغيره كانت بتتكلم عن التقرير اللي طلبته منها المدرسه عن تأثرها بأحد الشخصيات المهمة في حياتها .. والشخصيه دي كانت أحد الجنود في القصة اللي هي بتحكيها.. وتكتشف ان في حاجات هي اختلقتها وشخصيات ألفتها في خيالها وهي بتحكي الحدوته
لكن لما الفيلم بيخلص بتلاقي نفسك بتسترجع بعض اساسيات الثورة الفرنسيه .. واللي البنت كانت لخبطت فيها .. تلاقي ان اللي قالته البنت لو كان اتحقق صح .. كان هيغير حاجات كتير في الثورة الفرنسيه وفي اوروبا عموما

الربط بين الواقع والخيال في الدراما ده على قد ماهو صعب .. على قد ماهو بيخلي المشاهد يقعد يفكر ويتفكر في الكلام والفيلم ككل
زي مانت بعد ما اتفرجت عالفيلم فضلت الشخصيه دي مأثره فيك بكلامها وبحالتها
وانت ازيك وعامل ايه؟؟
يارب تكون بخير يارب





سلاموووووووووووووز

Soooo said...

محمد زهير

زوزو حليب هارتي وشريكي في الجروب
ازيك يابرنس
والله يازهير مش عارف اقولك ايه بجد

انت من أكتر الشخصيات اللي باعزها وباعتبرك زي اخويا والله العظيم
وربنا يعلم انا بحبك قد ايه

وياسيدي ياريت تشرفني دايما وتقول كل اللي تحب تقولو
واياك تعتذر وتتأسف .. خصوصا انك عارف اني باحب اتكلم معاك عن السينما وعن الحياه عموما

ربنا يسعدك ويكرمك ويوفقك ويرضيك دنيا وآخره يا صاحبي





سلاموووووووووووووز

Diyaa' said...

بحبك وإنت قاري ما بين السطور :)
القفلة بتاعتك عجبتني أوي يا واد

بقولك
هو ليه حاسس إنك لطيف أوي في نقدك السينمائي..بمعني ؟
بمعني إن كل فيلم يعجبك الناس كلها بتاخد عشرة علي عشرة..مفيش تسعة ونص طيب ؟ :) مش شفت الفيلم فمقدرش أحكم وده ذوقك ..بس برضه أكيد في حد ممثل ليه غلطة أو شوت مكانش مركز فيه مثلاً.. بس احتمال برضه يكون فيلم العمر لكل المشتركين فيه

وأعتقد إنك صح لأن فيلم بيوتيفول مايند أصلاً قصة مستمدة من واقع وهتبقي مكشوفة أوي لو اتسرقت

أول الغيث قطرة يا سعادة الناقد :)
سلام

Unknown said...

هايل يا سوو بجد تحليلك
مش هقدر اضيف حاجه معاك
بس انا الفيلم عجبتني فيه حاجه كمان
لما مامته قالتله ابوك مات
احنا كمان في السينما اتصدمنا زيه بالظبط في الفيلم
ودي عبقريه بجد
ملحوظه على جنب
ياريت تشوف فيلم زي النهارده وتقولي رايك

Anonymous said...

هايل...رؤيتك وضحتلى حاجات كتير عن السينما

مع انى كنت بحبها بطريقة لكن انت خلتنى احبها بطريقة وفهم تانى خالص

ورينا ابداعتك كتير بقة

تحياتى

Unknown said...

مبروووووك ياسووووووو
على المدونة الجديدة وبانر وحركات
حلوة اوى المدونة وتحليك للافلام بجد حلو اوى انت اخد بالك من كل حاجة مشاء الله عليك ..انت حتى حللت الافيش اللى انا ببصله كده شذرا
جهل بقى :)

مبروك سينماتك ياسوووو
ويارب كتر فى مدوناتك كده عشان اقرالك اكتر واكتر
سلااااااااام

Mony said...

تسلم ايدك و كيبوردك علي التحليل الممتاز


بجد بجد شوقتني اشوف الفيلم


بس انا هستني لما ينزل سي دي علشان انا عندي هسس من مرواحي للسينما


مبروك المدونة الجديدة

Alkomi said...

و الله يا سو الى حد ما نورتني

لان كل مناقشاتي في الحوار ده كانت بتدور مع متفرجين زي حالاتي عندهم مفهوم بسيط يقدروا بيه يميزوا الكويس من الوحش

فعلا لو حقيقة فهو قال كلام واقعي جدا ولو خيال فهو من ابداع المؤلف او من تهيؤات شخصية البطل لكنه ماهجصش علينا و قال كلام مزبوط و تمام

شكرا يا باشا

سلاميييييييييييييييخ

بالبطييييييييييييييخ

إبـراهيم ... said...

مش معقولة يا سووووو
.
.
بجد عشـرة على عشـرة

ما أعتقدش حد كتب عن الفيلم بالتفصيل ده والبراعة دي زيـك ....

الفيلم فعلاً حلو قوووي ، وكتباتك هنا أحلى بكثير ، تلفت الانتباه لمناطق جمال ممكن تغيب عننا زي لقطاتك اللي ع البوستر مثلاً ......

ممممممممممم
كنت شايف إنك ممكن كمان تضيف على كلامك اللي فيه إشادة بالفيلم ردك على الناس اللي هاجمته، وخصوصًا اللي قالوا إن حلمي هوا اللي كاتبه بعد كده رضا !!لأن الشخصيتين قريبين من بعض

.
.
وألف ألف مبروووووك على المدونة الجميلة دي

أنا كنت عامل حاجة إسمها (كلام سيمـا) بس معرفتش أكمل :)

nigro said...

سوووو
إزيك يا أبو حميد

طبعاً مش محتاج اقولك اني كنت باسمع البوست ده مش بأقراه
و افتكر إن تبريقة عيني لما كنت بأسمعك و انت عمال تحكيلي عن تحليلك للفيلم و احنا في المترو تلخص رد فعلي

انت فنان يا أحمد


يلا سلام

قلم جاف said...

قريباً سأحاول مشاهدة "آسف على الإزعاج" إن شاء الله لما يروق بالي.. أحترم وجهة نظرك لكني "أتوجس خيفة" من أي فيلم يلقى ثناءً أكبر من اللازم.. ويكفي مقلب "مافيا" -معرض الأخطاء المنطقية- و"العشق والهوى" -مدرسة الافتعال..

مبروك على المدونة التي أعجبتني جداً..

nigro said...

تصدق يا أحمد إني نسيت حاجة مهمة جدااااااً
نسيت أقولك
مبرووووووووووووووووووووووووووووووووووك
على تحفتك الجديدة
هي طبعاً متأخرة كتير
لكن
ليس على القروي الساذج حرج

إلى الأمام دايماً يا أحمد


يلا سلام

Unknown said...

مش ممكن
وفظيع
جدا
جدا جدا

Soooo said...

Diyaa'

ضياء حليب هارتي
ازيك يابرنس

بص بقى ياسيدي
اولا وباديء ذي بدئ يعني .. انا ما اديتش كل حاجه في الفيلم عشره من عشره
يعني القصه والسيناريو والحوار واخده تسعه ونص بس .. والموسيقى التصويريه واخد تمانيه من عشره

بس ده ما يمنعش ان العمل ككل حالة حلوة تستمتع بيها وانت في السينما

وعلى فكره .. المدونه دي عشان اتكلم عن الافلام اللي عجبتني .. وبالتالي لما فيلم هيعجبني هديلو اعلى درجات في الليله
فخمتو يابرنس

وانت ازيك وازي الحياه؟؟؟
ليك وحشه والله





سلاموووووووووووز

Soooo said...

لماضة

ماهي هي دي بقى المصداقيه والقدره على الاقناع
يعني احنا طول الفيلم متعايشين مع البطل وحدوتته
ومره واحده
قلم على قفا كل واحد بيتفرج
بس الصراحه .. قلم حلو قوي .. خدناه واحنا متمزجين قوي

وان شاء الله حاطط في الخطه فيلم قبلات مسروقه وفيلم زي النهارده .. وربنا يسهل واقدر اشوفهم واشوف لو هتكلم عنهم او عن فيلم منهم




سلامووووووووووز

Soooo said...

نبض اسكندرية

الف شكر ليكي على كلامك الجميل ده واللي انا اقل منه كللو

واهلا بيكي في اول زياره ليكي لمدونتي المتواضعه واتمنى انك تشرفيني دايما بمتابعاتك وبتعليقاتك

وربنا يسهل واقدر اكتب حاجه تعجبك وتعجب كل الناس






سلامووووووووووووز

Soooo said...

totaaaa

وحشاني وحشاني وحشاني
تلاته وحشاني والله يابنتي

وياستي ربنا يكرمك على كلامك الجميل ده وربنا يقدرني اكتب اللي يعجبك ويعجب كل الناس

والحكايه مش تحليل قد ماهو لما تشوفي حاجه وتعجبك .. بتقعدي مع نفسك وتشوفي ايه اللي عجبك
وماتختفيش كده يابنتي وطمنينا عليكي اول بأول






سلامووووووووووووووز

Soooo said...

mony

اهلا بيكي يافندم والف شكر على تعليقك وعلى كلامك الجميل ده

وباتمنى انك تشرفيني بتعليقاتك وبزياراتك دايما يارب

وبخصوص الهسس اللي عندك من مرواحك للسينما .. استنضفي سينما كويسه وادخلي في يوم وسط الاسبوع .. صدقيني هتستمتعي اكتر بجو الفيلم في السينما عن انك تشوفيه على شاشه في البيت





سلاموووووووووووز

Soooo said...

محمد الكومي

طب مانا مشاهد عادي برضه يا كومي
الحكايه مجرد تفكير في اللي بين سطور الشخصيه





سلاموووووووووووز

Soooo said...

إبـراهيم ... معـايــا

براهيم .. والله ليك وحشه يابرنز

وياسيدي الف شكر على تعليقك وعلى كلامك الجميل ده

بس الحقيقه انا اول مره اسمع الحوار بتاع ان في ناس اتهمت حلمي انه هو اللي اخترع الشخصيه ده

وبعدين فين التشابه اصلا في شخصية رضا سواءا كان سمسم او ميدي او البرنس .. وبين شخصية حسن في فيلم اسف على الازعاج؟؟؟
ولا هو عشان فيها مرض نفسي يبقى ولود عبد الواحد كلهم واحد؟؟؟

وسوري يعني .. حتى لو كانت الشخصيه دي من ابتكار حلمي ومش من ابتكار ايمن بهجت قمر .. ولو اني ماعتقدش ده ابدا .. ايه المانع يعني؟؟؟
ده نفس منطق مالقوش في الورد عيب قالوله ياحمر الخدين

الكلام عن السينما مش مجرد قصه الفيلم وبس .. الكلام عن السينما .. كلام عن السينما وعن الفيلم كلو

نورتني الحبه دول وعايز اشوفك قريب يابرنز






سلامووووووووووووز

Soooo said...

ňįĝŗő

الله يبارك فيك يا نيجرو ويكرمك يارب

والحمدلله ان كلامي البسيط ده عجبك ويارب يعجب كل الناس

ليك وحشه والله ياد
بص .. انا رايح شق التعبان اجيب شوية تظابيط .. لما هخلص هابقى اديك الو نتقابل على اي قهوة نواحيكم نشربلنا كوبايتين تي .. في الفيفتي




سلاموووووووووووز

Soooo said...

قلم جاف

اهلا بيك يافندم في اول زيارة ليك ويارب تكون مدونتي المتواضعه عجبتك
وياريت تشوف الفيلم ونتكلم مع بعض فيه

وبخصوص فيلم مافيا وفيلم عن العشق والهوى .. ماعجبونيش اصلا
ولو اني باعتبر فيلم مافيا يعتبر فيلم محطه .. يعني فيلم شجع ناس كتير انهم يتجهو لاتجاه الاكشن
ودي مصلحه بيني وبينك .. بدل ما كل الافلام كوميديا وضحك للضحك بس

وفيلم عن العشق والهوى .. فيلم معمول لاحمد السقا اكتر من انه فيلم سينمائي
يعني الفيلم ده بيحاول السقا فيه انه يمثل شويه عشان مايزنقش نفسه في قالب الممثل الاكشن وبس
وفشل فيلم عن العشق والهوى خلى السقا يفكر بجديه انه يرجع للأكشن بس يحاول يمزجه بدراما شويه .. وجرب ده في فيلم تيمور وشفيقه لكن برضه ماحققش النجاح اللي هو كان متوقعه
وبعدها رجع تاني للأكشن الصريح في فيلم الجزيره .. مع شرف عرفه مخرج فيلم مافيا .. وبكده يبقى السقا بيرجع نفس الكام خطوه اللي وقف فيهم

ايه ده
انا رغاي قوي ياعم

قريب هحاول اتكلم عن المخرجين المصريين المعاصرين واحاول اوضح فكر كل واحد فيهم من خلال الافلام بتاعته
وربنا يسهل ان شاء الله




سلاموووووووووووز

Soooo said...

امرأة الميزان

اهلا وسهلا بيكي يافندم
ويارب تكون شخابيطي البسيطه دي عجبتك
وياريت تعتبري مدونتي زي مدونتك وتشرفيني دايما





سلامووووووووووووز

اقصوصه said...

هالفلم شفت دعايته


وخاطري اشوفه

بس اعتقد بعدهما نزل عنا فالامارات

لين الحين

ان شاالله اول ما ينزل بدخله اكيد:)

فاروق عادل said...

مختفى يعنى مبتنزلش مواضيع جديدة

 
سينماتك - Templates para novo blogger