Monday, November 17, 2008

زي النهارده

الوقت .. دايما بيكون عنصر مهم في حياتنا .. وساعة الفرح بنحس ان الوقت فات بسرعه .. وساعة الحزن بتعيش جوانا سنين وسنين
!!! مع العلم ان الوقت (ساعة) في الحالتين
----------
أول ما شفت اعلانات فيلم زي النهارده .. لقيتها حالة غريبه .. فيها تشويق ودراما .. كمان حسيت ان الممثلين اللي بيمثلو بيحاولو يغيرو من نفسهم ويعملو حاجه خارج المألوف .. وده اللي خلاني قلت انا لازم اشوف الفيلم
بوستر الفيلم .. بسيط قوي .. صور لأبطال الفيلم محطوطه بشكل سيميتري او متماثل .. بس زي ماتكون مرسومه بقلم فحم .. وفي الخلفية خطوط وكتابة بالإيد .. وحسيت ان الفيلم فيه نوع من أنواع الاعتماد على الكتابة زي ما يكون من خلال طلاسم سحريه مثلا .. لكن قلت طلاسم ايه وسحر ايه .. دي تلاقيها فيها حد بيكتب مذكراته ولا حاجه

القصة والسيناريو والحوار .. لـ عمرو سلامة .. قصة جديده بكل المقاييس .. تناول فلسفي وفيه رمزية كبيره قوي لمفهوم حاجات كتير زي الوقت والقدر .. وبالرغم من ان في ناس اتكلمت وقالت ان المخرج متأمرك ومتأثر بفيلم هاجس او بريمونشن لـ ساندرا بولاك .. إلا ان الفيلمين مافيهمش أي تشابه .. لا في القصه .. ولا في التناول .. ولا في أي حاجه في رغيف .. لكن اللي قال الكلام ده تقريبا كده والله اعلم .. متضايق من ان التشابه الوحيد في الفيلمين .. ان البطوله نسائيه .. و تاه عن بالو .. انه عشان يفهم الحدوته صح .. لازم يقرا مابين سطور الحوار .. ويشغل عقله
نرجع للقصه والسيناريو والحوار .. مش عارف بس لاحظت ان الحوار كان طاغي عالسيناريو .. أو بمعنى أدق .. الكلام كان اكتر من الصورة السينمائية الغير حوارية .. مع ان عمرو كويس قوي في السيناريو .. واللي شاف افلامه القصيره قبل كده عارف ده .. بس ارجع واقول انه ممكن يكون السبب في ده .. خوفه من ان الناس والمشاهدين .. مايفهموش الموضوع غير بالحوار
وكمان انا كمشاهد مش باحب نوعية الافلام اللي بتكون فلاش باك وسرد على لسان البطل او البطله .. واعتقد انك لو كنت اجتهدت شويه يا عمرو .. كنت ممكن تلاقي مدخل تاني للفيلم .. زي ان الفيلم يبدأ بمجموعة المشاهد زي ماهي بنفس ترتيبها .. من غير أي تعليق مصاحب ليها .. والمُشاهد على آخر الفيلم هيستوعب الحدوته كلها بنفسه .. زي ماحصل والناس استوعبت العلاقه بين ياسر وأيمن وهم متصورين جنب بعض .. وربطت ده بآخر مشهد في الفيلم لما ياسر كان قاعد مع صاحبة مي
السيناريو والحوار .. تمانية وتلات تربع .. من عشره

التمثيل .. الفيلم نفسه بيفرض على الممثلين نوع تمثيل متعب .. واللي هو ان كل تفصيله وكل حركه بتتعمل .. بيبقى ليها مدلول معين من خلال سير أحداث الفيلم .. وده متعب قوي على الممثل
بسمه .. لما ظهرت أول مره على شاشة السينما كان تقريبا في فيلم الناظر .. وسرقت الكاميرا ببساطتها وابتسماتها الهاديه قوي .. وساعتها قلت انها امكانياتها التمثيليه محدوده .. وده مش عيب او تقليل منها على فكره .. بدليل ان محمد منير المطرب امكانياته الصوتيه محدوده .. لكن هو بيختار اللي يبروز صوته وامكانياته من كلمات وألحان .. وده اللي بسمه عملته في الفيلم .. من خلال الدور اللي مكتوب ببساطه ولازم اللي يعملو يفهمو كويس قوي .. وهي فهمت الورق واتحطت في الشخصيه صح
اكتر حاجه حلوه بقى .. هي انها اتحمّست لمخرج أول مره يخرج فيلم روائي طويل .. بدون ما يدوس في الاخراج كمساعد مخرج ومخرج منفذ والتسلسل اللي بيتعمل في الوسط السينمائي .. وحماسها ده بيدل على انها مجتهدة ومؤمنه بفنها وبقدرتها على التمثيل
عشره من عشرة يا بسمه
أحمد الفيشاوي .. نبرة الصوت اللي كنت بتمثل بيها واللي كانت باينه في الاعلان .. هي اللي شدتني للفيلم .. بس الغريب اني مالقتش أي مبرر ليها في الدراما او في الفيلم عموما .. اضافة على ان أي دور بالابعاد اللي عملتها لازم يكون مبني صح .. وهو على الورق مبني حلو قوي .. وانت كنت بتجتهد انك تعمل دورك صح .. بس كنت ملاحظ في حاجه في الاداء مش عارف ايه سببها .. خصوصا اني كنت حاسس ان كل مشهد ليك كنت زي ماتكون بتبدأ الشخصيه من الاول ومش عايشها .. وده مش بيحصل غير لما تكون بتفصل مابين كل مشهد والتاني وتخرج من الشخصيه .. في حين ان الاسلم ليك كممثل انك كنت تفضل (إن كاركتر) حتى في البريك .. زي ما كان - الله يرحمه - أحمد زكي بيعمل في كل أفلامه .. وكان بيعيش الدور حتى بعد التصوير ما يخلص خالص .. مش عارف هل ده كان بيحصل فعلا وقت التصوير ولا لأ .. بس انا حسيت كده
تمانية ونص من عشره يابو حميد
آسر ياسين .. لما شفته في فيلم الجزيرة لقيته واخد دور كبير نسبيا .. وحسيت ان أداؤه أوفر او متصنع وما أقنعنيش .. وتقريبا هو بنفسه أدرك أن أسلم وسيله للتمثيل هي تقمص الشخصيه وفهم كل أبعادها الدراميه .. وده اللي عمله في فيلم احنا اتقابلنا قبل كده .. لكن في فيلم زي النهارده .. أبصم بالعشره وبالعشرين كمان .. انك ممثل قدير يا آسر .. كفاية مشهدك وانت بتقول مجموعك كان كام في الثانويه العامه
عشرين من عشره يا آسر يا ياسين
أروى جوده .. الورق مكتوب للشخصيه بتجديد عن كل تناول لعالم المدمنين .. والتجديد اللي اقصده هنا مش في اعراض الادمان والاقلاع عنه .. لأنها تقريبا ثابته بناءا على دراسات علمية ونظريه .. التجديد اللي باتكلم عنه هنا هو في تناول حياة المدمنين نفسهم وكلامهم وحياتهم العاطفيه والتناقض اللي بيبقو فيه .. وانتي يا أروى في الفيلم كنتي واقعه مابين نارين - من وجهة نظري - اول نار كانت ان الورق مكتوب بعمق فلسفي حتى في الجمل الحواريه البسيطه .. وتاني نار في احساسك انك عايزه تعملي حاجه جديده عليكي وعلى المشاهدين .. وهي فعلا حاجه جديده وحاله حلوة .. بس اعتقد كده والله أعلم .. انك لو كنتي ركزتي سيكا صغننه كان دورك ده هيبقى دور عمرك .. لكن ملحوقه والجايات اكتر من الرايحات .. وانتي عندك كتير
تسعه من عشره
عبد العزيز مخيون .. الخبره ليها دور برضه .. لما ممثل بالخبره دي يطلع في مشهدين منهم ماستر سين الفيلم .. ويوصللي الحدوته كلها بكلمتين ويقنعني بشخصيته .. يبقى كده عبقريه فنيه .. وانت عبقريه فنية يا استاذ عبد العزيز مخيون
عشره من عشره يا استاذي
محمود البزاوي .. ممثل ممثل .. .. يا راجل ده انت خليتني أكرهك واتعاطف معاك في نفس الوقت
مليون من عشره
باقي الممثلين .. تسعه من عشره .. وممكن يكون ده لعدم استيعابهم لجو الفيلم والحاله النهائيه اللي هتبقى عليه .. وده طبيعي لأن اول اخراج لأي مخرج .. بيكون الممثلين متخوفين او مقلقين ومش شايفين أي سابقة اعمال للمخرج عشان يقدرو يفهمو ايه طريقته في الاخراج وتناول عناصر العمل السينمائي

الموسيقا التصويرية .. لـ هاني عادل .. والناس عرفت هاني من خلال فرقة وسط البلد .. وهاني في الفيلم ده واخد تيمة أغنية (تسمحيلي) اللي غنتها فرقة وسط البلد .. وبيلعب عليها في لقطات الفيلم .. يعني لما يكون الايقاع فيه شجن تلاقي اللحن ناعم وجملته حزينه .. ولما يبقى المشهد فيه فرح تلاقي الموسيقا التصويريه قلبت على فرايحي من خلال كوردات الجيتار والايقاع .. مع انه نفس اللحن في كل الحالات
واللي عمله هاني عادل وعمرو سلامه في الموسيقا التصويريه ده .. بجد حالة حلوه قوي .. لسبب بسيط .. هو ان عمرو استغل حب الشباب لفرقة وسط البلد وفرقة كايروكي – اللي بتظهر في جزء من الفيلم – ولعب على ده عشان يوصل الموضوع بواقعية قريبه من الشباب .. خصوصا ان عمرو من أكتر الناس اللي وقف جنب وسط البلد وكايروكي وعمللهم كليبات .. منها على سبيل المثال .. اغنية وسط البلد واغنية أنتيكا اللي غنوها وسط البلد .. واللي باعشق حالة حماس الهواة فيهم .. وانهم مش محترفين وبس .. لأ .. دول بيحبو اللي بيعملوه .. ومتحمسين ليه
عشره من عشره يا هاني يا عادل .. وشايف فيك حالة نضج فني حلوه قوي

التصوير .. أحمد جبر .. وده يعتبر تاني فيلم يكون مدير التصوير فيه بعد فيلم (آخر الدنيا) اللي كان من اخراج أمير رمسيس .. واحمد جبر في الفيلم ده عمل شوية لقطات تٌدَرّس بجد .. يعني مشهد بسمه وهي بتجري ورا اخوها وأيمن خطيبها في أول الفيلم .. كنت حاسسني باجري وراهم فعلا من كتر الهزة اللي في التصوير .. ومجموعة مشاهد آسر ياسين وأروى .. خصوصا مشهدهم وهم قاعدين عند مكنة الفيزا كارد .. حسيت اني قاعد ومتربع عالارض وعايش معاهم كلامهم وحوارهم .. ومشهد آسر وهو واقف على حرف البلكونه .. لقيتني انا اللي واقف بجد مش حد تاني .. وطبعا مشهد الساعه بتاع بسمه وهي نايمه عالسرير وباصه عالسقف وحركة الكاميرا .. بصراحه شغل الإضاءة وزوايا التصوير جديده جدا
باختصار .. احمد جبر عمل حاجات كتير .. ولسه هيعمل كمان وكمان
عشرين من عشره يا احمد

الديكور .. شيرين فرغل .. الديكور كان في المجمل واقعي .. خصوصا وانه كان من خلال كزا لوكيشن .. بيت بسمه واللي الديكور بتاعه دافي جدا وبيدي احساس بالراحه النفسيه للمشاهد من خلال الفرش والألوان .. وشقة آسر اللي فعلا بمجرد ماتشوفها تحس انك في شقة واحد في الضياع .. الفرش متبهدل والالوان باهته والشروخ اللي في الحوائط .. اضافة لمشاهد تانيه زي المنطقة الشعبيه اللي بيجيب منها آسر المخدرات .. والاوضة اللي بيسكن فيها لما بيهرب من البوليس .. والاوضة دي هي اللي خلتني اتأكد ان الديكوريست هايل .. لسبب بسيط جدا .. ان عادة الغرف اللي بتتأجر للمجرمين والهربانين بتكون صغيره جدا لأنها بتكون في قمة العشوائيات والمناطق الشعبيه .. وده حصل فعلا في المشهد ده .. حسيت ان الاوضة ضيقه جدا جدا .. كمان في مشهد خلاني بصمت بالعشره للديكوريست انه احساسه عالي قوي .. وهو مشهد احمد الفيشاوي وهو في التصوير في الفيلم .. اللي بيمثله جوا الفيلم
وأصعب حاجه على الديكوريست .. انه يعمل لوكيشن تصوير .. داخل لوكيشن التصوير الاساسي
الديكور .. عشره من عشره

المونتاج .. لـ عمرو سلامه .. واللي عرفته ان اللي كان هيمنتج الفيلم حد تاني غيره .. لكن حصلت ظروف وهو اللي عمل المونتاج .. والحق يتقال .. مافيش مونتير في الدنيا كان هيقدر يعمل الشغل اللي عملو .. لأنه هو أكتر واحد حاسس بإيقاع الفيلم
ايقاع الفيلم ده مختلف عن ايقاع أي فيلم مصري شفته .. لأن القصه نفسها مش قصة عاديه وليها ابعاد نفسية .. ومع اول منتجه حصلت في اول الفيلم وجري بسمة .. قلت المونتاج حلو .. تقطيعات الشوتات .. وايقاعها من حركة بطيئه مع صوت الموسيقا التصويريه وصوت انفاس بسمه وهي بتجري .. عملت شغل عالي عالي عالي
ولو هفضل اتكلم عن المونتاج في الفيلم هاحرق حاجات كتير قوي .. وانا بصراحه مش عايز احرق حاجه .. وعايز الكل يتفرج عالفيلم عشان يقول رأيه فيه
المونتاج .. سبعتلاف تٌمنٌميه وتسعتاشر .. من عشره

الاخراج .. لـ عمرو سلامه .. واللي لما سمعت انه هيخرج فيلم روائي طويل من حوالي سنتين مثلا او يمكن اقل .. قلت كويس قوي .. خصوصا اني كنت شفتلو كام فيلم روائي قصير من شغله وسمعت عنه من ناس كانو معايا في فريق مسرح تطبيقيه .. زي التؤأم حاتم وعمرو رياض .. وزي عمرو وشاحي .. لكن عرفت ان في صعوبات بتواجهه عشان مش متخرج من معهد السينما .. ولازم يدفع مبلغ للنقابه عشان تسمحلو يمارس العمل السينمائي .. وبالرغم من المبلغ ده كان مبلغ بسيط قوي زمان وكان المنتج بيدفعه عادي .. لكن النقابه طلبت مبلغ كبير قوي .. وده لأنهم اعتقدو خطأاً .. ان كل المخرجين بيكونو منتجين .. زي مجدي الهواري لما أخرج فيلم خمسه وخمسين اسعاف .. وقلت لنفسي ساعتها ان عمرو مش هيخرج ولا هيطلّع الحلم اللي بيحلم بيه .. خساره .. الواد بيخرج حلو قوي ياخواننا
لكن هنعمل ايه بقى .. حكم النقابه على الهواة .. زي .. حكم القوي عالضعيف
لكن لما عرفت ان محمد حفظي السيناريست .. واللي أسس شركة كلينك للإنتاج وانتج فيلم ورقة شفرة .. تحمّس وعمل المستحيل عشان عمرو يخرج اول افلامه الروائيه .. قلت هو ده الفن بجد

نرجع لـ عمرو سلامه .. عمرو رصيده من الافلام الروائيه القصيره .. اربع أفلام .. عذاب نفسي .. ساعة زمن .. الشهادة .. الاعلان .. ولو دستو على كل فيلم هتلاقو لينك على يوتيوب تشوفو الفيلم .. كمان أخرج حوالي اربع اعلانات وتلات اغاني لـ وسط البلد وكايروكي .. وفيلم وثائقي عن مرض الايدز .. ويعتبر فيلم زي النهارده هو أول فيلم روائي طويل .. وأول ابن من أبناؤه على طريق الاحتراف .. وكنت حاسس انه طول الفيلم مطلع عين الفنيين اللي معاه .. لأنه عايز يعمل شغل عالي بتكنيك مختلف عن السائد .. وده في حد ذاته حلو .. لأنه كمخرج كان بيشتغل باحساس الهاوي .. ومافيش احسن من ان الواحد يعمل اللي بيحبه وبيهواه .. واكيد اكيد اكيد .. كل الفنيين اللي اشتغلت معاهم .. بعد ما شافو الفيلم .. قالو نفس اللي انا هقولهولك ياعمرو .. انت بجد .. حد جميل قوي
ويعلم ربنا اني مش قصدي زي مانت قايل هنا
مش عارف اقول ايه تاني عنك ياعمرو بصراحه .. بس صدقني انت اديت أمل كبير قوي لشباب بيحاولو يحققو جزء من أحلامهم .. شباب في ناس بتقول عنهم انهم بيحلمو وأحلامهم أكبر منهم
وإياك .. ثم إياك .. ثم إياك .. تكسر أمل الناس دي
عايزين نشوف ابداعاتك بقى .. نفسنا في سينما نضيفه وممتعه كده ياجرع
الاخراج لعمرو سلامه .. عشرة من عشرة
--------
ملاحيظ .. يمكن تلاحظوها
.. في جزئية في الفيلم بتؤكد ان عمرو سلامه واحد من الجيل بتاعنا فعلا
لما بيتقال اسم الدكتور رفعت اسماعيل
------
.. الموضوع الجاي ان شاء الله .. مش هيكون عن فيلم مصري .. هيكون عن فيلم
Body of lies
واللي من بطولة ليوناردو دي كابريو وراسل كرو .. واخراج ريدلي سكوت
والفيلم بيتكلم عن كواليس المخابرات الأمريكية .. في الشرق الأوسط .. والدول العربية
وربنا يستر .. ويجعل كلامنا خفيف عليهم
سوووو

20 comments:

مهندس مصري بيحب مصر said...

عشرة على عشرة كالعادة يا سوو
و تعليق الواحد هنا بقى مكرر و ممل ليك اكيد
كل مرة الله ينور و عظمة على عظمة و مية مية
الكبير كبير برضه
:)
بس ياريت طلب خاص بقى مع الفيلم الأجنبي تحط لينك لتحميله

Unknown said...

والله يابني انت الي تاخد عشره على عشره مش خساره فيك
الفيلم ده من اجمل الافلام الى شفتها الفتره الاخيره
هو واسف على الازعاج
نوعيه جديده من السينما النضيفه

Mony said...

بتحليلك للفيلم بتخليني اجري ادور عليه علشان اشوفه من كتر اعجابي بالتحليل

و انا بتفرج بفضل مركزة في الحاجات اللي بتقول عليها كلها


يعني كده الواجب بتاعي اني اتفرج علي فيلم زي انهاردة


ربنا يسهل

Z_Diva said...

tab ana a3ml fek eh bas

kol mra ab2a asln hmout washof elfilm, wenta t5liny b2a 5las ha5od tayra 3ala elma7rosa wagy 3shan ad5ol elsima :S

bas ella olly ya 3am, how rafraf mazkour esman fa2at, walla sa5syto mangoda felfilm ??????

ojg said...

انا اتأخرت قووووووووي
ممكن أحجز وأقرا ؟
:)

ojg said...

لالالالالالالالالالالالالا
ايه ده؟؟؟
مش ممكن
من أحلى المرات اللي شفتك فيها بتتكلم عن فيلم
بجد
كلامك محسسني كالعادة إنك بتشوف الفيلم بعين تانية غير اللي بشوفه بيها
أي نعم لما شفت الفيلم عجبني حاجات كتيييير انت ذكرتها
بس مافصفصتهاش كده
ناقد بجد
فنان فنان
:)
والله مش بشكر فيك يا أحمد
بس أنا استمتعت بقراءة النقد ده جدا
يمكن بما يقرب لإستمتاعي بالفيلم نفسه
لدرجة إني عايزة أقرا البوست تاني
زي ما بالظبط بفكر أدخل الفيلم تاني:))
تسلم ايديك
وهستنى فيلم
Body of lies
:)

محمد فاروق الشاذلى said...

البوست ده شجعنى قوى إن ادخل أشوف الفيلم

Crystal Lobna said...

الفيلم ده أنا شوفته و حبيته أنت على فكره يا سووو بجد ناقد درجه أولى ربنا يوفقك

aya said...

اتنين مليون وربعميت الف من عشرة يا احمد

بص انا مش بحب انك تغيب
لكن لو هتغيب وترجع تعمل بوست زى ده
يبقى هنعصر على نفسنا لمون ونستحمل غيابك عشان الكلام الجميل ده

بجد الله ينور على عبقريتك

التحليل اكتر من رائع

تسلم يا احمد

ابن حـجـر الـعـسـقـلانـى said...

جميل قوى يا سوووو

انت بالفعل بالمدونة دى عامل حاجة ليها قيمة كبيرة

بجد .. هاستنى دايما تدويناتك فيها عشان أروح أتفرج على الأفلام اللى بتتكلم عنها

تقيل تقيل بجد

Rehab Mostafa said...

يوم مادخلت فيلم آسف على الازعاج كان نفسي أشوف الفيلم ده علشان اعلاناته شدتني جداً خصوصاً الكلام اللي بتقوله بسمه في الاعلان زي ان اللحظه بتفرق لما بتنقذ حد من الموت وانها بتشوف حاجات بتتكرر في حياتها... لكن بصراحه أحمد حلمي طبعاً شدني أكتر اني أدخله ودخلت أسف على الازعاج وماندمتش اطلاقاً مطلقاً وبجد كان فيلم عبقري زي مانت اتكلمت عليه كده بالظبط وبيني وبينك أنا قلت أحمد حلمي بعد كده رضا مش هيعرف يمثل زيه(ده احنا كنا بنصقفله ف السينيما والله) لكن بصراحه عمل شغل جامد
بس لما روحت تاني وكنت عايزه أدخل زي النهارده برضه قلنا لأ احنا مش عايزين نكتئب ودخلنا للأسف الشنييييييييييع فيلم الزمهلاويه اللي ماكنش حد غيرنا ف السينيما وعرفت ليه بصراحه لانه فيلم شخيف جداً جداً جداً وساعتها بقى ندمت:))
وانت كده شدتني أكتر اني أشوف الفيلم بصراحه يا سوووو
شوري اني اتكلمت على فيلم آسف على الازعاج أكتر من زي النهارده بس أنا قريت ال 2 بوست دلوقتي :):$

3ala asm masr said...

مش عارفه الفيلم ليه معجبنيش بس اوعى تقولى انى مش بفهم
لانى الحمد لله فهمت القصه والله
بس حسيت انى فيه حاجه ناقصه عشان اخرج منشكحه كده زى ما انت انشكحت

Anonymous said...

الله .. دماغك بجد تتاقل .. تحليلك للفيلم روعة .. انا حللت الفيلم ده على مدونتى.. بس بجد ميجيش جب الىل قلته حاجة
انت بجد فنان :)

MKSARAT - SAYED SAAD said...

مبروك المدونة يا سووووووو
بجد جميله وعجبتنى
اتمنالك التوفيق
سيد سعد

مهندس مصري بيحب مصر said...

هههههههههههه
ايه التعليق اللي فات ده
هو سووووووووووو بقى اخت عزيزة

دا راجل يا استاذ كمبيوتر

Soooo said...

ههههههههههههه

والله العظيم انت عسل يا هندزا

مهندس مصري بيحب مصر said...

ما هي حاجة تضحك الناس اللي بتحط اعلانات من غير ما تكلف نفسها شوية جهد في معرفة المدونة و صاحبها
هو برنامج كويس و كل حاجة
بس ياريت يدققوا قبل ما يعلنوا :)

اقصوصه said...

شوقتيني لهالفلم بحديثك عنه

ان شالله بحاول اشوفه لو قدرت

كل عام وانتم بخير

وتقبل مروري من هنا

Anonymous said...

احييك على هذه المدونه و كل مدوناتك
و تحليلاتك جامده جدا برافو عليك
ممكن اعرف انت درست السينما ولا دي هوايه؟؟

إبـراهيم ... said...

تخيل إني مختلف معاك كليَا في الموضوع ده، وكنت كتبت ف مدونتي (كـلام سيمــا) إن الفيلم ده طلع أي كـــلام !!!


مش فاضي طبعًا أفند وأكتب بتفاصيل زي سعادتك كده


بس كنت منتظر رأيـك :)

تحياتي يا باشا

 
سينماتك - Templates para novo blogger