Thursday, December 18, 2008

Body of Lies

العنف بيولّد عنف .. وساعات العنف المقابل بيكون أقوى في رد فعله من العنف البادئ
لدرجة ان العنف المقابل .. ممكن ينهي حضارات الدول اللي بدأت بالعنف
بس السؤال هنا .. هل هيتحقق العدل والمساواة في الحالة دي !!؟؟
------
لما سمعت عن فيلم
بُدي أوف لاَيز .. وانه هيتعرض في مصر .. اتحمست جدا جدا .. لأنه من اخراج ريدلي سكوت .. وده مخرج باعشقه .. يمكن لأنه مخرج فاهم ازاي يربط مابين الجمهور والنقاد .. ويمكن لأنه من أكتر المخرجين مناصرة لحقوق الإنسان .. وأكثرهم إدراكًا لمدى العنف في التوجهات السياسية الأمريكية .. خاصة في دول الشرق الأوسط
وفعلا .. ماندمتش اني رحت شفت الفيلم
بوستر الفيلم .. بسيط ومافيهوش أي فزلكه ولا اختراع .. لأن الفيلم بسيط وبيناقش حدوته بسيطه .. ولأن هوليوود بطبعها بتعرف تصنع سينما تجارية .. حطت صورة النجمين بتوع الفيلم جنب بعض .. مع ان أدوارهم مش متماثلة زي ماممكن يعتقد اللي يشوف البوستر
-----
القصة والسيناريو والحوار .. مبدأيا القصة مستوحاه من رواية بنفس الاسم اتنشرت في الفين وسبعه وحققت نجاح كبير .. والرواية للروائي ديفيد إجناتوس .. واللي ليه خمس روايات تانيين غير الرواية دي .. وبيتكلمو في اطار عالم المخابرات والجاسوسية .. وتأثير ده على الحياة الاجتماعية والاقتصادية .. ولكن تم تعديل بعض الحاجات فيها عشان تناسب انها تتعمل فيلم سينمائي .. خصوصا ان الرواية في الاصل بتبدأ في هيئة الفلاش باك
السيناريو والحوار لـ وليام مونان .. وده سيناريست واخد جايزة الأوسكار عن فيلم دي بارتد .. وهو اللي كتب القصة والسيناريو والحوار لفيلم مملكة الجنة
وفي الفيلم بتاعنا أو فيلم بُدي أوف لايز .. بيحاول انه يبعد عن سردية الرواية ويحولها لأحداث .. وبالرغم من وجود بعض المشاهد الحوارية الطويلة شوية .. لكن الواحد ماحسش بملل قوي .. وده نتيجة الاهتمام بإيقاع الفيلم ككل من المخرج وباقي فريق العمل
تسعه ونص من عشره .. من وجهة نظري يعني
-----
التمثيل .. الفيلم ده ممكن اقول انه بداية نجوم .. ونهاية نجوم .. ولو اني ماحبش ان أي حد من اللي مثلو في فيلم زي ده .. ينتهي نجمهم
-
ليوناردو دي كابريو .. في الفيلم ده بيجسد شخصية جديدة عليه خالص .. وهي شخصية ظابط مخابرات متخفي وعايش مابين العراق والدول العربية المحيطة بيها .. مهمته هي القبض على أحد الإرهابيين .. والحقيقه بالرغم من عدم اقتناعي بيه كممثل في افلام كتير وكنت شايف انه مجرد واحد حليوه ومقطقط .. لكن في الفيلم ده لقيته في حالة نضج غير متوقعه .. واعتقد ان الفيلم ده بجد هو بداية الممثل ليوناردو دي كابريو كممثل .. وليس كفتى وسيم فقط
!!! عشره من عشرة يا أبو اليوناردويه .. مانا مش عارف أدلعك اقول ايه
-
راسل كرو .. اعتقد كده والله اعلم ان السبب الوحيد اللي خلّى راسل كرو يعمل الدور بتاعه في الفيلم ده .. انه هيشتغل مع فريق فيلم جلاديتور او المصارع .. لأن دوره هنا في الفيلم ده على الورق .. مش بقوة أدواره اللي اتعودنا عليها .. زي فيلم بيوتفل مايند وفيلم أمريكان جانجستر وفيلم يوما تلاته وعشره .. وده بالرغم من إن معظم الجمل الحواريه المهمة في الفيلم هو اللي بيقولها
بس أرجع تاني واقنع نفسي واقول .. ان مجرد فيلم يحمل اسم ريدلي سكوت كمخرج .. شرف لأي ممثل
سبعه من عشره يابو كرو .. بس ماتعملهاش تاني إحياة أبوك ياشيخ
-
مارك سترونج .. والناس ممكن تفتكره من دوره في فيلم سريانا .. لما كان عامل شخصية الموسوي .. ولغاية ماخلص الفيلم بتاعنا .. كنت معتقد انه ممثل عربي الجنسيه او ليه أصول عربيه .. لكن بعد الفيلم فوجئت انه انجليزي تماما .. والحق يقال يعني .. الممثل ده حوووووت .. وفي القريب هيكون امتداد لـ ألباتشينو و روبرت دينيرو .. خصوصا ان ملامحه جامده وفيه شبه كبير قوي من آندي جارسيا
كفاية انه في الفيلم ده خلاني كرهته وقرفت من معاملاته لـ ليوناردو دي كابريو .. وتعاطفت معاه وشجعته .. مع ليوناردو دي كابريو برضه
عشرة من عشرة يا مارك
-
جولشيفتا فاراهاني .. أو جولشيفتا فرحاني .. حاكم دي ممثله ايرانيه أصلا .. وبدات التمثيل وهي عندها ست سنين .. ابوها ممثل ومخرج مسرحي ايراني اسمه باهيزاد فرحاني .. وامها واختها برضه ممثلين
ولو بصينا على دورها في الفيلم كممرضه من أصل عراقي .. وهربت هي واختها وأسرتها واستقرو في الأُردن .. واتعرفت على ليوناردو دي كابريو على انه صحفي .. وحصل اعجاب متبادل مابينهم .. هيوصل للي بيتفرج عليها انها في اول الموضوع كانت خايفه منه لأنه أمريكاني وهي عراقيه هربانه من بطش الامريكان في العراق .. بينما لما حست بالأمان ليه نتيجة زيارته ليها ولأهلها وتعاطفه معاهم ومع قضيتهم الانسانيه .. حبته وهو كمان حبها .. لدرجة انه كان هيموّت روحه عشانها .. وهي دي نقطة تلاقي الشعوب في الفيلم .. الحب
تسعه ونص من عشره يا جولشيفتا يابنت الحاج فرحاني
-
علي سليمان .. واللي شاف فيلم بارادايس ناو أو الجنة الآن .. هيبقى فاكر الممثل ده .. ودوره في الفيلم بتاعنا يعتبر دور عمره .. ونجح في انه يبقى فعلا فعلا عمر صدقي .. وسمع توجيهات ريدلي سكوت صح قوي
كفاية انه هو الفيلم .. وانه هو جسم الأكاذيب .. أو الـ بودي أوف لايز
عشرة من عشرة يا علي
-----
الموسيقا تصويريه لـ مارك ستاريتن فيلد او مارك شترايتن فيلد .. اصلو ألماني والعالم بتوع جرمانيا دول لغوتهم صعبه .. وانا بليد في الجريجي اساسان
الراجل ده بقى .. مالوش حل .. يعني أبسط حاجه هو اللي عمل الساوند تراك بتاع فيلم مملكة الجنه وفيلم لاست ساموراي .. وفيلم ماتشستك مان .. وهانيبال .. والصخرة أو ذا روك .. يعني حاجه كده ألماني ألماني يعني
وفي الفيلم ده .. عرف يمزج الموسيقا الشرقية بالموسيقا الغربية بطريقة بنت تييييييت .. كفاية حالة الهارموني اللي في مشهد تفجير السفارة الأمريكية - اللي افتعلته المخابرات الأمريكية - مع حالة التوتر والقلق اللي جات عند المهندس عمر صدقي - اللي عملته المخابرات الأمريكية كأنه إرهابي وهو المنفذ للعملية دي - .. ده انا بعد الحالة دي لو كنت شفت أي أمريكاني .. كنت قتلته رميًا بالتِفافه
!!! ميه من عشره يا مارك يا شترايتن فيلد .. ولا سترايتن فيلد ولا أي فيلد وخلاص
-----
التصوير لـ الكسندر ويت .. وهو صانع مؤثرات بصرية كمان .. ومن الأفلام اللي عملها .. فيلم تربل إكس .. وفيلم جلاديتور .. وقراصنة الكاريبي الجزء التاني .. و ذا إتاليان جوب .. و تويستر أو الإعصار .. يعني شغلو كللو ابهار
وفي الفيلم بتاعنا عمل كام شوت حلوين قوي من تفجيرات ومناظر طبيعية ومشاهد رومانسية ناعمة .. واتفنن في عمل زوايا تصوير جديده عشان المشاهد مايزهقش من الجمل الحوارية الطويله .. وعمل شغل إضاءة حلو قوي خصوصا في آخر مشهد
كمان سَرَعني حتة سَرعة في مشهد تفجير من التفجيرات .. لدرجة ان اللي كان جنبي بقى على حجري
خُمسمية من عشره يا ألكسندر
-----
الديكور وتنسيق المناظر .. سونجا كلاوس .. والحقيقه انا ماعرفش ده راجل ولا ست .. بس مش ده المهم .. المهم هو الشغل اللي بيعملو .. يعني مثلا عمل ديكور فيلم أمريكان جانجستر .. وفيلم مملكة الجنة .. وسلسلة أفلام تومب رايدر .. وجلاديتور .. وآخر فيلم عمله هو فيلم بابل بعد الميلاد
وبالرغم من انه بيتفنن في الجو المبهر والاسطوري .. لكن في الفيلم بتاعنا كان الديكور وتنسيق المناظر بمنتهى الواقعية .. ويمكن اللي خدمه في كده .. ان الفيلم اتصور اكتر من سبعين في الميه منه في دول عربيه وشرق أوسطية .. وده إدالو خبره في التعامل مع الألوان والملامس .. والحالة الجافة في طبيعة الديكورات في الدول العربية
عشره من عشره يا سونجا
-----
المونتاج لـ بيترو سكاليا أو بيترو سشاليا .. أصلو طـُلياني .. والعلم عند الله في طريقة نُطق اسم ابوه
والراجل ده واخد جايزتين أوسكار احسن مونتير .. مرّه عن فيلم بلاك هوك داون .. ومرّه عن فيلم جي إف كيه او جون كينيدي .. ومن نوعية المونتيرين اللي بيهتمو بايقاع الفيلم ويعيدو شغلهم مليون مره .. خصوصا ان الفيلم ده زي ماقلت فيه جمل حوارية كتير .. وبالرغم من التنويع في زوايا التصوير والتنويع في الموسيقا التصويريه برضه .. لكن يبقى المونتاج هو أهم حاجه في الحفاظ على الايقاع العام
وهو فعلا حافظ على الايقاع وماحستش بأي لحظة ملل
ألف من عشرة يابيترو
-----
الإخراج .. للحوت الكبير قوي .. ريدلي سكوت .. واللي مش هتكلم عن مُجمل أعماله وعن ترشيحه للأوسكار تلات مرات
.. ومش هتكلم عن انه خد أكتر من عشرين جايزة في أكتر من مهرجان
.. وبرضه مش هتكلم عن إحساسه بالمسئولية تجاه فنه واهتمامة بأدق التفاصيل
.. بس هتكلم عن حاجه واحده بس
لما مخرج يؤمن بإن الإنسان هو القضية .. وإن الإنسان بالرغم من الحدود الوضعية والفواصل اللغوية من حقه يعيش ويحب .. يبقى ده مخرج فنان بجد
مليون من عشره يا
ريدلي ياسكوت
-------
كام ملحوظه

حاولت اكتب الأسماء بالجريجي لكن لقيت الكلام اتشقلب وحصلت حالة فلقطه رهيبه .. قمت كاتبهم بالعربي .. وكل اسم باللون الأحمر لو دوستو عليه هتلاقو لينك تاخدكم للمصدر اللي خدت منه الخبر على موقع
الآي إم دي بي
----
في ناس زي مهندس مصري .. طلبو مني اشوفلهم لينك تحميل الفيلم .. والحقيقه انا ماعرفش اذا كانت النسخه الدي في دي نزلت ولا لأ .. بس لو مانزلتش يبقى يستحسن ماحدش يتفرج عليه تصوير سينما .. لأن هيفوته حاجات كتير قوي
----
الفيلم الجاي اللي هتكلم عنه لو ربنا ادانا عمر بإذن الله .. هيكون فيلم الوعد .. ده في حالة اني شفته وعجبني .. ولو مالحقتوش سينما او شفته وما عجبنيش .. يبقى هتكلم عن فيلم وثائقي تسجيلي أمريكي بس فظيييييع .. اسمه
Where In The World Is Osama Bin Laden !!??
أين أسامة بن لادن في العالم !!؟؟

والفيلم ده بيفضح حاجات كتير قوي في سياسة الزعماء العرب

.. وهحاول في خلال الفترة الجايه .. ارفع الفيلم ده على موقع رفع
.. عشان الفيلم ده بجد لازم ينتشر .. ويتوغل .. ويستمر .. ويستمر
!!!! و ربنا يسترها علينا وعلى ولايانا
-----
تحديث .. بطعم الفرحه
-------------------
انا باشكر مهندس مصري على انه حط لينك للفيلم عشان لو حد حابب يتفرج عليه
واللينك اهو .. بس لازم تكون مشترك في المنتدى ده عشان تعرف تشوف الموضوع
وكمان باشكرك ياهندزا على انك صححتلي الجزئية بتاعة ان التفجير اللي افتعلته المخابرات الأمريكية .. ماكانش في السفارة الأمريكية زي مانا قلت في الموضوع .. لأ .. التفجير كان في قاعدة عسكرية أمريكية في تركيا
-----------
وكمان باشكر الشندويلي على تصحيحه للمعلومات اللي قلتها عن مارك سترايتنفيلد واضع الموسيقا التصويرية للفيلم
والشندويلي ده بجد موسوعة في أي ساوند تراك بخصوص أي فيلم .. روحو وشوفو مدونته .. دماغ دماغ يعني
-------
.. وبجد انا فرحان أيما فرح بحالة التواصل دي .. بالرغم من قلة التعليقات
لكن كللو يهون قصاد اننا نقول حاجه كلنا مع بعض
سوووو

8 comments:

Bravo_fox said...

فيك تعدّ لي كام فيلم عملو عادل امام مش مقتبس عن فيلم اجنبي؟ وكام مرة كان يحضر الفيلم المقتبس حتى يقلد الشخصية؟ هيدا ما خلاّ من جاك لمون ل آل باتشينو لهنري فوندا لروبرت ريدفورد الخ... يللا شغل مخك وعد. اصلا كل الافلام الغير مقتبسين كانوا فاشلين. هيدا انسان زكي وعرف يضحك على الناس

مهندس مصري بيحب مصر said...

انت شوقتني طحن اني اشوف الفيلم ده
و حانكت النت كله عليه لحد ما اجيبه ان شاء الله و ساعتها حأهاديك باللينك يا باشا
الله ينور

مهندس مصري بيحب مصر said...

هو ده افضل لينك لتحميل الفيلم
http://www.sohbanet.com/vb/showthread.php?t=54840
بس حتحتاج التسجيل في المنتدى
:)

مذكرات مشاغب said...

انا لما قريت معظم مواضيعك السينمائيه السابقه
اعجبت بشده باسلوبك وبمعلوماتك وبارائك
وده خلاني انتظر الفيلم القادم
عشان اقدر اعلق بدري يعني
واشكرك على المجهود الرائع والمعلومات المهمه والغزيره عن كل شخص من الفيلم
لكني ايضا مقتنع ان الفن اي فن تذوق
يعني انا ممكن اشوف فيلم حلو او احد عناصره حلو وغيري يشوفه وحش
ويباه الاتنين ما غلطوش
انا للاسف لسه ما شوفتش الفيلم وان كان عندي على الكمبيوتر من فتره
لان صورته مسروقه ولاني مش لاقي وقت عشان انزل اشوفه
لكن شكلي هضطر اجي على نفسي واشوفه بعد الشرح التفصيلي والرائع اللي انت شرحته
واشوف يا ترى هقدر اشوفه زي مانت شايفه كده ولا لأ

مهندس مصري بيحب مصر said...

يا سلام يا عم احمد
يعني كان لازم تخليني ادور على الفيلم و اشوفه
استلقى وعدك بقى يا عم
:D

انا شايف ان دور راسل كرو كضابط مخابرات بارد و قاسي و غير مبالي بأي شخص غير امريكي او غربي عموماً حتى لو تعاون معهم في وقت من الاوقات
و عمله في المركز الرئيسي للمخابرات المركزية الأمريكية
و مصايبه اللي بيعملها من هناك و يتورط فيها ليوناردو هنا
شايف ان الدور كويس و ه مثله كويس
مش عارف انت كنت عايز مين يمثله ؟

التفجير يا سيدي كان لقاعدة إنجرليك الامريكية في تركيا
مش تفجير لسفارة
:)

و شكراً على جمال البوست بتاعك ده برضه يا غالي
و انك خليتني شفت الفيلم الجميل ده بجد

سؤال على جنب
فيلم الوعد اللي حتشوفه بتاع روبي ؟
إعلاناته ما تطمنش و شكله زي 7 ورقات كوتشينة
إثارة و تشويق و متعة
:))

ست البيت said...

يا مهندس مصري احنا حيلتنا في الافلام كلها غير التشويق
احنا منعرفش نناقش غير قضية الخلع

بفتح الخاء يا عزيزي

واد يا سوووو
محسسني أن اسمع ايه دا رفيق مش عارف مين

او يوسف شريف رزق الله

يا بني السينما الامريكية بتناقش المواضيع بحرية فعلا
مش فارقة معها الايرادات قوي
يعني مهتمين بصناعة فعلا
بصرف النظر عن وجهه نظري في الصناعة د ي
بس هما لو عملوا فيلم كوميدي تضحك بجد
فيلم خارج
يبقى بجد
والله العظيم عمري ما شفت فيلم خارج احين الناس تفكر فيا وحش
ربنا يعافينا
فيلم سياسي يبقي في الجون
بوليس تتتخض

احنا منعرفش غير منطقة واحدة للتمثيل
اما تخرج متعرفش الفيلم عاوز يقول ايه
يا اما افلام من عينة خالد يوسف

اخبار حمزة ايه

Anonymous said...

Where in the World is Osama bin Laden
فيلم راائع فعلا مستنيين تعليقك علية

El - Shandwely said...

بخصوص الموسيقى التصويرية ..فــمارك سترايتنفلد
مش هو اللى عمل موسيقى "مملكة الجنة" اللى عملها الموسيقار "هارى جرجسون" مارك كان ضمن فريق الموسيقى لكنه مش اللى عملها هو كان المشرف الموسيقى
بالنسبة لفيلم "زا لاست ساموراى " و"ماتشستك مين" و"هانيبال"و"الصخرة" فاللى عمل الساوند تراك بتاعهم الموسيقار العظيم "هانز تسيمر " مارك كان بيبقى ضمن فريق او وحده الموسيقى تبع هانز اما مساعد او مشرف على الموسيقى لكنه مش صانعها
"مارك "عمل موسيقى "ا جود يير" و"امريكان جانجستر" والفيلم بتاع البوست "بودى اوف لايز" وخلينى اقولك ملحوظة .. ان التلات افلام دول مخرجهم هو "ريدلى سكوت" وريدلى سكوت كان الموسيقار المفضل واللى بيبقى معاه فى كل افلامه هو "هانز تسيمر" لكن توقف التعامل مابينهم للاسف ..بعدها ريدلى سكوت مراحش بعيد خد واحد من الفريق بتاع هانز هو "مارك"وبقى هو اللى بيعمله مزيكة افلامه
اسف على التطويل .. وتحليل اكتر من رائع

 
سينماتك - Templates para novo blogger