Friday, January 23, 2009

where in the world is osama bin laden !!?

.. الخطر بيحوم حوالينا في كل وقت وكل مكان .. وساعات بنخاف من حاجات مانعرفهاش
.. ولما الخوف بيتملّك مننا قوي .. بنحس بقيمة الحياة .. وبنحارب عشانها
وفي وسط الحرب .. بنضيّع حاجات كتير قوي .. هي نفسها أصل الحياة

------
مبدأيا كده .. ممكن اللي عايز يتفرج عالفيلم بتاعنا .. ينزلو من لينك من الكام لينك اللي هاحطهم .. وعلى مايقرا اللي انا كاتبه عن الفيلم .. ويكتب لي تعليقين تلاته تسعه .. يكون الفيلم نزل
أول لينك .. عالـ ميجا أبلوود
ولينك تاني للفيلم .. عالـ بادونجو
ولينك تالت كمان اهو .. عالـ ديبوزيت فايلز
.. والفيلم نازل بالترجمة بتاعته جاهز منه فيه .. ونازل باكستنشن آر إم في بي
يعني اللي يشغلو برنامج الريل بلايير
بوستر الفيلم .. زي ماهو واضح باين انه بيتكلم عن الدول العربية .. خصوصا ان اسم الفيلم أين اسامة بن لادن في العالم !؟ .. كمان في حالة سخريه من التركيبه بتاعة الشخص الامريكاني - هو نفسه بطل ومخرج الفيلم - اللي لابس غترة وعقال وجلابيه بيضا .. وراكب الجمل وكأنه كاوبوي في الغرب الأمريكي
-----
القصة والسيناريو والحوار .. قصة مشتركه مابين جيرمي شيلنيك .. و مورجان سبورلوك .. مخرج الفيلم
والحقيقه هي مش قصة وسيناريو وحوار من اللي احنا متعودين عليه .. يعني مش قصة حب وغرام وانتقام وبتاع .. لأ .. ده فيلم وثائقي تسجيلي .. وروائي برضه في نفس الوقت .. يعني حالة غريبه لذيذه .. قايم على فكرة معينة .. والفكرة في حد ذاتها هي الفيلم .. ولما جيت باشوف أي معلومات عن الفيلم ده بعد ما اتفرجت عليه .. عرفت ان فكرة الفيلم نفسها كانت (إفيه) أو قفشة ساخرة .. قالها مورجان لـ جيرمي عالتليفون
الإفيه بيبدأ لما مورجان سبورلوك بيعرف من مراته انها حامل .. وبيفرح بقى وبتاع .. وبيتصل يقول لـ جيرمي عالموضوع ده .. وبعد ما جيرمي بيباركلو ويهنية .. يقوم سبورلوك يقولو وهو بيضحك .. بس انا خايف على ابني اللي جاي ده .. من اسامة بن لادن
!!!!!!
وهنا اللمبة اللي في نافوخ كل واحد فيهم راحت منوّرة .. وتاني يوم اتقابلو .. وفي خلال شهر وكام يوم .. كانو محضرين القصة والسكرين شوت والتصاريح .. ودوس يا معلم
-
لو جينا اتكلمنا عن جيرمي شيلنك .. هنلاقي ان الفيلم ده هو أول فيلم يشارك في كتابته .. بس هو في الاساس منتج فني .. وساعد سبورلوك في انتاج فيلمين تسجيلين تانيين قبل الفيلم ده .. واللي هم فيلم الموجة التالته .. واللي بيتكلم عن رحلة مجموعة متطوعين لسيريلانكا بعد اعصار تسونامي .. وفيلم المسيح ممكن يشتري ايه ؟؟ .. والحقيقة انا ماعرفش الفيلم ده ولا شفته .. عشان ما افتيش عليكم يعني
شيلنك كمان ساعد سبورلوك وعملو مع بعض كام حلقه من مسلسل اسمه تلاتين يوم .. وهو مسلسل واقعي واقعي - مش مسلسل واقعي من بتوعنا - فكرته قايمة على ان واحد يتحط في مكان ومجال تاني غير اللي اتعود عليه لمدة تلاتين يوم
----

مورجان سبورلوك .. بدايته مع السينما كانت في فيلم ليون .. وكان ساعتها مجرد مساعد في فريق إنتاج الفيلم .. ومن هنا ابتدى يفهم الليله .. وبعد كده اشتغل منتج فني لمسلسل من النوع الواقعي اسمه أراهنك .. هتعملها !! .. وكل الفترة دي كانت بالنسبه ليه تحضير لأول فيلم تسجيلي يكتبه ويخرجه بنفسه .. اللي هو فيلم سوبر سايز مي .. واللي قصته قايمه على ان في قضايا كتير اترفعت على مطاعم التيك أواي في امريكا .. انهم بيعملو اكل غير صحي - خاصة ماك دونالدز - وبيقرر في الفيلم ده انه يعيش على اكل من ماك دونالدز لمدة شهر .. وفي خلال الفيلم بنشوف تأثير الاكل التيك اواي عليه .. خصوصا انه كان بياكل أكل صحي قبل الفتره دي .. وصحته كانت زي الفل
بعدها اشتغل سبورلوك كمنتج ومنتج منفذ لمجموعة حلقات مسلسل تلاتين يوم .. واللي يعتبر امتداد لفكرة فيلم سوبر سايز مي .. خصوصا ان الفكرة للفيلم والمسلسل .. فكرة واحده .. فكره قايمة على تجربة معينة لشخص معين في مدة تلاتين يوم
ومن ضمن حلقات مسلسل تلاتين يوم .. اتعملت حلقه بعنوان تنظيم القاعدة , اعرف عدوك .. ودي كانت بداية التحضير والتفكير لفيلمنا النهارده .. اين أسامة بن لادن في العالم !!؟
القصة والسيناريو والحوار .. تسعة من عشره
----
التمثيل .. الفيلم ده مافيهوش ممثلين .. كلهم ناس طبيعين جدا .. ناس من أمريكا ومصر والمغرب والسعودية وفلسطين المحتله - سواءا كانو فلسطينين بيستقبلوه بترحيب .. او يهود بيضربوه ويطردوه من تل أبيب - وناس من الاردن و أفغانستان وباكستان .. ناس عاديين جدا بيعمل معاهم مورجان سبورلوك حوارات ويسألهم عن أمريكا وايه رأيهم في السياسة الأمريكية .. وبيسألهم برضه طول ماهو في الفيلم .. هو اسامة بن لادن فين ياخواننا ؟؟؟
التمثيل .. تسعة ونص من عشرة
----
الموسيقا التصويرية .. وهي عباره عن مزج مابين مجموعة أغاني نزلت وقت هوجة بن لادن واحداث حداشر سبتمبر .. مع شوية مزيكا تانيه اتعملت للفيلم .. واللي عمل الموسيقا التصويريه اتنين .. جيم بلاك .. و باري كول
ومن وجهة نظري .. الموسيقا التصويرية كانت أقل حاجه في الفيلم .. خصوصا انهم ماعندهمش خلفية عن المزيكا القريبه من كل شعب وكل بلد بيتصور فيها الفيلم .. وكانو بطبعهم الأمريكاني بيستسهلو ويجيبو أي حاجه وخلاص .. واهو كللو شرق أوسطي
الموسيقا التصويرية .. سته من عشره
----
التصوير .. نوعية التصوير في الافلام التسجيلية الواقعية اللي من النوع بتاع فيلمنا .. مختلفه عن تصوير السينما او تصوير الافلام الروائية العاديه .. لان الافلام الروائية العادية بتتصور بكاميرا واحده .. بينما في الفيلم بتاعنا بيصورو بكذا كاميرا .. وفي وقت واحد .. ومن غير سكريبت حركة .. يعني حركة الكاميرا مان او المصور بتبقى حره .. طبعا مع مراعاة ان ما يخبطش اتنين كاميرا مان في بعض .. وكمان بيحاولو على قد ما يقدرو مايصوروش بعض .. ولو ده حصل مابيبقاش مقصود .. ومع ذلك بيدي طعم حلو للرؤيا والواحد بيحس ساعتها انه في وسط المعمة
النوع ده من التصوير بدأ في مسلسلات الواقع .. ومن وجهة نظري بصراحة .. التصوير بالاسلوب ده بيبقى مرهق جدا .. لكن ممتع جدا جدا جدا
مدير التصوير للفيلم بتاعنا .. دانيال مراكينو .. وابتدا شغلو الاول في التلفزيون والمسلسلات .. وبعدين اشتغل مدير تصوير في فيلم المسيح ممكن يشتري ايه ؟؟ .. ومن هنا بدأ حبه لتصوير الافلام التسجيليه
التصوير .. عشره من عشرة
----
المونتاج .. زي ماهو التصوير في نوعية الافلام التسجيليه دي مختلف عن التصوير في افلام السينما الروائيه .. المونتاج برضه مختلف .. لأن المونتير في حالة فيلمنا مش بيتعامل مع خام كاميرا واحده ولا بيقطع المشاهد بناءا على سكريبت مكتوب .. لأ .. ده بيتعامل مع كذا فيلم طالعين من كذا كاميرا .. والمفروض يشوف انهي لقطة هي الاحسن .. طبعا مع مخرج الفيلم .. وبناءا على كده يبدأ شغلو
الميزة في شغل المونتاج هنا في الفيلم بتاعنا .. انه بيسيب حرية أكتر للمونتير انه يظبط ايقاع الفيلم .. بناءا على الاتفاق مع المخرج أكيد
مونتاج فيلمنا عامله اتنين .. جيفين كولمان .. وده بدأ بمونتاج افلام قصيرة قبل ما يخش في طاعون مونتاج الأفلام التسجيلية .. والمونتير التاني هو جولي بوب لومبارد .. وده يعتبر بدأ اول شغل مونتاج ليه في فيلم سوبر سايز مي لنفس مخرج فيلمنا .. وبعد كده اشتغل مونتير لمسلسلات تلفزيونية
المونتاج .. مليون من عشرة
----
الاخراج .. اول ما طلع فيلم سوبر سايز مي واتعرض .. عمل فرقعة بنت لذينا .. واترشح لكزا جايزة منهم جايزة الاوسكار كأحسن فيلم تسجيلي .. لكن فاز فعليا بأربع جوايز .. منهم جايزة مهرجان أدنبرة لأحسن مخرج عن أول عمل .. وجايزة الإم تي في أحسن فيلم تسجيلي .. وجايزة من اتحاد الكتاب الأمريكين عن أفضل سيناريو لفيلم تسجيلي
وخد برضه سبورلوك جايزة عن فيلمنا النهارده من مهرجان ميلبورن عن أكتر فيلم وثائقي تسجيلي شهرة

أول ما طلع سبورلوك والناس عرفته .. قالو انه خليفة مايكل موور .. مخرج فيلم حداشر سبتمبر فهرنهايت .. واللي اترشح للأوسكار مرتين وخدها مرة عن فيلم بولنج فور كولومبيان .. وخد جوايز تانية كتير
لكن من وجهة نظري .. سبورلوك أقوى من موور .. لأنة بيناقش باسلوب ابسط وبعيد عن الفلسفه والتشتت اللي بيعملو موور للي بيتفرج على افلامه .. كمان سبورلوك عنده قبول حلو قوي قدام الكاميرا .. والاحساس الكوميدي عنده واضح وبسيط .. وبيتعمد دايما انه يقفل اعماله بابتسامة حلوة .. بيحسها اللي بيشوف حاجه ليه
وبعد الفيلم ما يخلص .. الواحد بيلاقي نفسه تلقائيا .. هو كمان بيبتسم
الاخراج لـ مورجان سبورلوك .. عشرة من عشرة
----
.. ملحوظة

.. في جمله مهمة جدا بيقولها المخرج وبطل الفيلم ..
.. واللي هي طالعه على لسان الحكومة الأمريكية .. عن حسني مبارك .. وبيقولو عنه
He may be a son of a bitch ..
but he is our son of a bitch

وربنا يسترها علينا وعلى ولايانا
سوووو

12 comments:

Unknown said...

هههههههههه
سوو
ولا اعرفك
امسكوه المدونة دي هتتشمع بالشمع الاخضر
الفيلم وقف بعد ما كان بقالي يومين بحمله
الله اعلم بقى بالنوايا

3ala asm masr said...

خاف الله خاف
انا خايفه عليك

adel said...

انا مردتش ارد الا لما نزلت الفيلم و اتفرجت عليه

تصدق 10/10
الفيلم و كلامك و انا اسمحلي هاكتب عنه برضه لو ميضيقش

و اااقولك انت دماغك في الافلام عاجبني و انا ساعات بكتب برضه

لسه متفرج عي قيلم اوعي بفوتك
واخد جولدن جاوب و مترشح للاوسكار

عامل كده زي
City of God(Cidade de Deus)(2002)
و
حين ميسرة عندنا

اسمه

SlumDog Millionaire (2008)

لبجد من الاخر

Soooo said...

لماضة

اطمأني يابنتي
اللينكات شغاله والحمدلله .. والحمدلله فيها الفيلم اللي اتكلمت عليه

وبعدين شمع اخضر ايه؟؟
في شمع في الدنيا لونه اخضر؟؟
هم هيقفلو زريبة يابنتي

اسمه شمع اصفر .. هفضل اعلّم فيكي لغاية امتى




سلاموووووووووووز

Soooo said...

3ala asm masr

انا مالي انا بقى
ده رأي الحكومة الأمريكااني
هم بقى يتصرفو مع بعض




سلامووووووووووز

Soooo said...

adel

طب الحمدلله ان الفيلم عجبك
ويارب يكون الكلام اللي قلته فيه شيء من الصواب

وياسيدي اتكلم براحتك خالص
وانا عارف انك هتتكلم عنه بطريقه كويسه لأني الى حد متابعك

وعلى فكرة .. انا بادور على الفيلم اللي قلتلي عليه .. بس مش لاقيه دي في دي ريب
لو عندك نسخه كويسه .. انا ممكن ابقى اقابلك في اي يوم واجبلك الفلاش كي تحطلي عليها الفيلم
لأن الفيلم ده انت مش متخيل انا نفسي اشوفو قد ايه


ملحوظه

قريت الكلام اللي كتبته عن فيلم ويل سميث الأخير
هو في المجمل حلو .. وانت حاولت تخرج بره نطاق الممثل والقصه والنقد التقليدي
بس حاول تهتم أكتر بتفاصيل في صناعة الفيلم نفسه

وبالتوفيق يا عدولا




سلاموووووووز

مهندس مصري بيحب مصر said...

أنا فاكر كلامك معايا على الفيلم ده قبل كده
حأشوفه و أرجع أعلق تاني
:)
و انت عارفني لو فيه غلطة في البوست مش حأسيبك
هههههههههههههههههههههههه
الله ينور بجد يا هندسة

adel said...

SlumDog Millionaire (2008)

واخد 4 جولدن جلوب و مترشح ل 10 اوسكار

http://rapidshare.com/files/177242384/dataSMilli.part1.rar
http://rapidshare.com/files/177242220/dataSMilli.part2.rar
http://rapidshare.com/files/177242399/dataSMilli.part3.rar
http://rapidshare.com/files/177242245/dataSMilli.part4.rar

or

http://speedshare.org/download.php?id=82D72CF53
http://speedshare.org/download.php?id=5B042C683
http://speedshare.org/download.php?id=AD2F7D0D3
http://speedshare.org/download.php?id=EAF399F53

or

http://www.netgull.com/?d=B8BFB8EB1
http://www.netgull.com/?d=D0B679891
http://www.netgull.com/?d=22DAB7FA1
http://www.netgull.com/?d=FDEC46FD1

or

http://w19.easy-share.com/1903001322.html
http://w19.easy-share.com/1903001326.html
http://w19.easy-share.com/1903001324.html
http://w19.easy-share.com/1903001325.html

kolhom nafs el-password : ultrascorp

اي خدمة....و حاضر
انا ابتديت اخد بالي من حاجات صغيرة بسببك

و مقالي عن بن لادن هتنزل الخميس و هاعمل تحديث و احطها ان شاء الله

Z_Diva said...

bos ya basha, ana mn nakdak lelaflam sra7tan bab2a 3yza ashofha, bas mesh 3rfa sa3at bkasl lma mesh bl2iha men elno3 elly bysthweny, l2n 3adatan ana malish fe alflam eltasgylya we ay 7ga liha da3wa be el real world :D

ha7wel atfrg 3lih, bas mesh ha2dr aw3dak bsara7a :D, bas walahy i enjoy this blog awy, m3 e7tramy lelblog elab tab3an :D

by the way, howa mozakirat tfl t5en 5lst wala eh, enta nstna ya 3am :S ????????

Crystal Lobna said...

كلامك عن الفيلم خلانى أنزله رغم أنى مش بحب الأفلام التسجيلية أصلاً بس حشوفه . لما ينزل أن شاء الله

Zika said...

سوووو
المدونه دي مفيده اوي يا سوو
انا حاسس اني بتعلم سينما والله ما ببالغ
بجد تحليلاتك منطقيه
والفيلم بصراحه نازل من زمان لكن للاسف ماكنتش متوقعله انه يكون كويس
لان الموقف الامريكي بقي ساذج اوي في تعامله مع العرب وخصوصا عن طريق السينما
وعموما الجمله اللي في اخر البوست دي كانت كفيله اني انزل الفيلم
هاتفرج واجيلك

MSMO said...

يصراحة مورجان سبورلرك
أقل حاجة تتقال عليه أنه أستاذ أنا شفت الفيلم من ساعة ما نزل وتحليلك رائع
والجملة اللي اتقالت علي مبارك بجد جملة روعة
وردة محبة وسلام

 
سينماتك - Templates para novo blogger